Qazax nazirin şəkli kriminal avtoritetin ölüm işində

Qazaxıstan nazirinin şəkli kriminal avtoritetin ölümündə şübhəli bilinənlər arasında yerləşdirilib. 

Qırğızıstanlı əməliyyatçılar Qazaxıstanın idman və mədəniyyət naziri Arıstanbek Muxamediulın fotosundan cinayətkarı tapmaq üçün istifadə ediblər. Belə ki, nazirin şəkli digər şübhəlilərlə birgə şahidlərə göstərilib. Artıq Qırğızıstanın Daxili İşlər Nazirliyi məsələ ilə əlaqədar olaraq nazirdən üzr də istəyib. DİN məsələ ilə bağlı belə açıqlama verib:

“Qırğızıstandakı mütəşəkkil cinayətkar dəstə rəhbərinin ölümündən bir neçə gün əvvəl kiminlə görüşdüyünü müəyyən etmək üçün bənzər insanların fotoları toplanıb. İnternetdən yığılan şəkillər arasında nazirin də şəkli olub. Bu, o demək deyil ki, nazir şübhəli qismində bilinir. Sadə bir əməliyyat səhvidir”.

Nazir Arıstanbek Muxamediulı isə bu xoşagəlməz hadisəni soyuqqanlı şəkildə şərh edib:

“Ağlagəlməz və qəribə məsələdir. Kimisə məhkəməyə vermək haqqında düşünmürəm. Çünki Qırğızıstan DİN-i artıq məndən üzr də istəyib”.

Qeyd edək ki, kriminal avtoritet Almambet Anapiyayev Minskdə öldürülüb. Onun kəsilmiş-deşilmiş cəsədi fevralın 18-də, maşının baqajında aşkarlanıb. O, İnterpol xətti ilə axtarışda olub. (qafqazinfo)

Ölkə.Az