Meksika Senatında Novruz bayramı qeyd olundu

Meksika Senatında Novruz bayramı münasibətilə təntənəli mərasim keçirilib.

Ölkə.Az "AzərTac"a istinadən xəbər verir ki, Azərbaycanın bu ölkədəki səfirliyinin təşəbbüsü və Meksika Senatının təşkilati dəstəyi ilə keçirilmiş tədbirdə Azərbaycan, Türkiyə, İran, İraq, Pakistan, Gürcüstan və Qazaxıstan respublikalarının Mexikodakı səfir və diplomatik heyəti, Meksika Senatının üzvləri, ölkə ictimaiyyətinin tanınmış nümayəndələri və dəvət olunmuş digər qonaqlar iştirak ediblər.

Səfirlikdən bildiriblər ki, tədbirin əvvəlində sözügedən ölkələrin nümayəndələri tərəfindən zeytun ağacı əkilib. Bu ağacın Azərbaycan, Türkiyə, İran, İraq, Pakistan, Gürcüstan və Qazaxıstan xalqlarının Meksika Senatına hədiyyəsi olduğunu əks etdirən xatirə lövhəsinin açılışı olub. Lövhədə, həmçinin BMT Baş Assambleyasının A/RES/64/253 saylı qətnaməsi ilə Beynəlxalq Novruz Gününün qəbul edildiyi, habelə Novruz bayramının YUNESKO-nun qeyri-maddi mədəni irs siyahısına daxil edildiyi yazılıb.

Meksika Senatının xarici əlaqələr komitəsinin sədri xanım Qabriela Kuevas Barron tədbirin keçirilməsi təşəbbüsünə görə Azərbaycan səfirliyinə dərin təşəkkürünü bildirib, Novruz bayramının tarixi və beynəlxalq Novruz ənənələri mövzusunda çıxış edib.

Həmçinin çıxış edən İran və Türkiyə respublikalarının səfirləri Novruz bayramının tarixi-mədəni irsi və xüsusiyyətlərindən bəhs ediblər.

Tədbir çərçivəsində iştirakçı ölkələrin Novruz ənənələrini əks etdirən foto-sərgi keçirilib.

Mərasim iştirakçılarına Azərbaycan milli mətbəxinə aid şirniyyat təamları təqdim olunub.

Ölkə.Az