Ekspert: "Donbasdan qayıdan rus döyüşçülər cəmiyyət üçün təhlükə törədirlər"

Donbasda atəşkəs elan edilməsindən sonra Rusiyaya qayıdan döyüşçülər daxili sabitliyin pozulması üçün əsas faktor rolunu oynaya bilərlər.

Ölkə.az Rusiya KİV-lərinə istinadən xəbər verir ki, bunu "Sova" analitik informasiya mərkəzinin direktoru Aleksandr Verxovski deyib.

"Donbasda müxtəlif dünyagörüşlü və müxtəlif fikirli insanlar döyüşüb. Onlar müharibə vaxtı yeni qruplar və yeni ideyalarla tanış olublar. Bu onların müharibədən sonrakı psixikalarına təsirsiz ötüşməyəcək. Onlar hansısa siyasi cərəyanlara qoşulacaq, özlərini digərlərindən "düzgün" vətəndaş sayaraq mövcud siyasi quruluşun əleyhinə çıxacaqlar. Bu böyük bir təhlükənin astanada olduğundan xəbər verir. Xüsusən də miqrantlar onların hücumlarına məruz qalacaqlar", deyə Verxovski bilodirib.

Xatırladırıq ki, artıq bir ildir Ukraynanın şərqində gedən döyüşlərdə çox sayda rus hərbçisi və muzdlusu vuruşmaqdadır. Rusiya bu faktı inkar etsə də, təxmini rəqəmlərə görə Donbasdakı rus hərbçilərinin və muzdluların sayı 12 minlə 17 min arasındadır.

Ölkə.az