SON DƏQİQƏ:Türkiyədə terrorçular prokuroru girov götürdü

Türkiyə daha bir şok yaşayıb.

Ölkə.Az Türkiyə mediasına istinadla xəbər verir ki, Berkin Elvan istintaqını aparan prokuror Mehmet Səlim Kiraz Ədliyyə Nazirliyindəki otağında İnqilabçı Xalq Azadlıq Partiyası Cəbhəsi üzvləri tərəfindən girov götürülüb.

Otaqdan silah səsləri eşidilib və dəhliz dərhal boşaldılıb. Məlumata görə, şübhəli şəxslərin istədiyi tələblər yerinə yetirilməsə, prokuror qətlə yetiriləcək. İnqilabçı Xalq Azadlıq Partiyası Cəbhəsi terrorçuları 5 tələb irəli sürüblər:

1 - Berkin Elvanı qətlə yetirən polislərin canlı yayımda etiraf etməsi.

2 - Polislərin mühakiməsi.

3 - Bu günə qədər Berkin Elvan üçün keçirilən hərəkatlarda cəzalandırılan hər bir şəxsin azad edilməsi.

4 - Hadisə yerindən təhlükəsiz şəkildə uzaqlaşmaq üçün şəraitin yaradılması.

5 - İctimai əsaslarla formalaşdırımış qrupla ünsiyyət yaratmaq imkanının verilməsi.

Hal-hazırda terrorla mübarizə qüvvələri və xüsusi hərəkat polisləri nazirliyin binasının altıncı mərtəbəsində yerləşən otağı hər tərəfdən mühasirəyə alıblar.

Xatırladaq ki, respublika prokuroru olan Mehmet Səlim Kiraz Gezi Parkı hadisələrində yaralanan və 269 gün komada qalandan sonra həyatını itirən 15 yaşlı Berkin Elvanın ölümüylə bağlı istintaqa baxır.

Keçmiş adı İnqilabçı Sol olan İnqilabçı Xalq Azadlıq Partiyası Cəbhəsi Türkiyədə fəaliyyət göstərən silahlı terror təşkilatıdır. Təşkilat Dursun Karataş tərəfindən 1978-ci ildə Türkiyənin demokratik yollarla inkişaf edilməsinə etiraz əlaməti olaraq SSRİ-nin yardımıyla yaradılmışdı.

Ölkə.Az "DHA"ya istinadən hadisə yerindən canlı yayımı təqdim edir:

Rəşid Mustafazadə

Ölkə.Az