Poroşenkonun “Roshen”i niyə mühasirəyə alındı?

Ukrayna prezidenti Petro Poroşenkoya məxsus “Roshen” şokolad zavodunun OMON-çular tərəfindən mühasirəyə alınmasının səbəbi açıqlanıb. 

Bu barədə TASS Agentliyinə İstintaq Komitəsinin nümayəndəsi Vladimir Markin danışıb. Onun sözlərinə görə, Lipetsk zavodundakı axtarış büdcədən 180 milyon rubl yayınma ilə bağlı açılmış cinayət işinə görə aparılıb:

“Bu gün Lipetskdəki “Roshen” ASC və Nijni-Novqoroddakı “Metallimpress” MMC-də axtarışlar aparılaraq, istintaqa lazım olan sənədlər götürülüb. Araşdırmalardan sonra vergidən yayınmanın detalları açıqlanacaq. Dövlət büdcəsinə ciddi ziyan dəyib”.

Cinayət işi Rusiya Federal Təhlükəsizlik Xidmətinin sənədləri əsasında başlayıb. 

İstintaqın yaydığı məlumata görə, 2012-2013-cü illərdə sözügedən şirkət Rusiya Federal Vergi Xidmətinə guya 1 milyard rubl dəyərində işin görüldüyü barədə saxta sənəd göndərib. Daha sonra isə əlavə 180 milyon rubl da təzminat tələb edib. 

Qeyd edək ki, “Roshen”in  bu filialı hələ 13 il əvvəl açılıb və ümumilikdə zavodun istehsal etdiyi məhsulların Rusiya bazarındakı payı 7%-dir. (Qafqazinfo)

Ölkə.Az