Lukaşenko: "Əhali və rəhbərlər Krımın müqəddaratını yaşamaq istəmirlər"

Lukaşenko əmindir ki, Luqansk və Donbas əhalisi Ukrayna ilə qalmaq istəyir.

Ölkə.Az rus mediasına istinadən xəbər verir ki, Belarus prezidenti Aleksandr Lukaşenko növbəti dəfə ukrayna münaqişəsinin dinc yolla həll olunması ilə bağlı çıxış edib.

Onun fikrincə, münaqişə tərəfləri müzakirə masasına əyləşməlidirlər.

"Əgər özünü DXR və LXR adlandıran bu qopmuş ərazilərə "Siz harada olmaq istəyirsiniz?" sualını versək, onlar Ukraynada olmaq istədiklərini deyəcəklər. Nə əhali, nə də orada qalan rəhbərlərin Krımın müqəddaratını yaşamaq arzuları yoxdur. Daha nə lazımdır? Bu torpağın sənə məxsus olduğunu və orada insanların Ukraynada yaşamaq istədiklərini bilərək, niyə qarşılıqlı addımlar atılmasın və rəhbərlər müzakirə masasına əyləşməsin?", - deyə prezident deyib.

Lukaşenko əlavə edib ki, hər kəs Ukraynada dəyişikliklərin edilməsinin vacibliyini bilir və onlar konstitusiyada düzəlişlər edilmədən mümkünsüzdür.

"Kimsə federallaşdırma, kimsə muxtariyyətdən, ukrayna hökuməti isə desentralizasiyadan danışır. Desentralizasiya yaxşıdır. Bu gün bu əraziləri hər hansı xüsusi statusla tanımaq lazımdır. Gəlin, edək, müharibə bitsin. Zamanla hər şey düzələcək, əgər biz Ukraynada sülh və ərazi bütövlüyünü istəyiriksə", - deyə Lukaşenko bildirib.

Rəşid Mustafazadə

Ölkə.Az