Odessada azərbaycanlının restoranlarını öldürülmüş idmançıya görə yandırdılar

Gecə saatlarında atışma olan Odessada, Akademik Qluşko küçəsində yerləşən “Sultan” və Bolşoy Fontanın 7-ci stansiyasında yerləşən “Abşeron” restoranları yanıb. Hər iki restoran azərbaycanlıya məxsusdur.

Azərbaycan restoranlarının yanması birbaşa olaraq yəhudi xəstəxanasında baş verən faciə ilə əlaqədardır.

“Bu, dostunu itirən və vəziyyəti araşdırmayan insanların intiqamı idi. Həqiqi qatilləri axtarmaq əvəzinə, onun həmvətənlərindən intiqam almağı qərara alıblar və ən rahat obyektləri – diasporanın üzvlərindən birinə məxsus olan restoranları seçiblər. Xoşbəxtlikdən azərbaycanlılar hər şeyi başa düşüblər və “Vendetta” törətməyiblər. Amma kim isə bu münaqişəni etnik qarşıdurma kimi təqdim etmək istəyir”, - DİN-də olan mənbə agentliyə bildirib.

Xatırladaq ki, Odessada bir sıra faciəli hadisələr baş verib. Deribasovski küçəsində qadına görə bir qrup kişi mübahisə edib və bir neçə nəfər yəhudi xəstəxanasına yatırılıb. Narazı qalan ikinci tərəf tibb müəssisəsinə gedib, orada da atəş səsləri eşidilib. Nəticədə məşhur idmançı, beynəlxalq səviyyəli idman ustası Sergey Laşenko həlak olub.

Bir neçə saat sonra isə Akademik Qluşko küçəsində yerləşən “Sultan” və Bolşoy Fontanın 7-ci stansiyasında yerləşən “Abşeron” restoranları alışıb.

Qeyd etmək lazımdır ki, bu, Odessada azərbaycanlılarla əlaqədar baş verən ilk belə hadisə deyil.

Xatırladaq ki, 2015-ci ilin fevral ayının 2-də Odessada Azərbaycan diasporası nümayəndələri ilə “Avtomaydan”ın fəalları arasında geniş kütləvi dava olub. Davada 100-dən çox adam iştirak edib. Münaqişəyə xüsusi təyinatlı tağım (keçmiş “Berkut”) qarışaraq, davanı dayandırıb.oxu.az

Ölkə.Az