İŞİD 2 səfirlik əməkdaşını öldürdü

İŞİD terror qruplaşması Cənubi Koreyanın səfirliyinə hücum edib. 

Terrorçuların Cənubi Koreyanın Liviyadakı səfirliyinə etdiyi hücum nəticəsində 2 nəfər ölüb. Silahlılar paytaxt Tripolidəki səfirliyə yaxınlaşaraq mühafizəçilərə atəş açıblar. Bundan sonra isə qaçıb gizləniblər. Həlak olan 2 mühafizəçidən başqa daha bir nəfər səfirlik mühafizəçisinin yaralandığı bildirilir. "Hücum nəticəsində Cənubi Koreya vətəndaşlarından heç kim xəsarət almayıb. Hücumun məqsədi də bəlli deyil, belə ki, onlar səfirlik ərazisinə girməyə cəhd göstərməyiblər", - deyə Cənubi Koreyanın Xarici İşlər Nazirliyinin rəsmi nümayəndəsi bildirib. Hadisə baş verəndən bir neçə saat sonra İŞİD terror qruplaşması məsuliyyəti öz üzərinə götürüb.

Qeyd edək ki, Cənubi Koreya öz vətəndaşlarına 6 ölkəyə getməyi qadağan edib. Bunlar Liviya, Əfqanıstan, İraq, Yəmən, Suriya və Somalidir. Bu ölkələrə səyahət etmək üçün Cənubi Koreya hakimiyyətinin xüsusi icazəsi olmalıdır. (ANS)

Ölkə.Az