Aİ “Google” şirkətini 6 milyard dollar cərimələməyə hazırlaşır

Avropa İttifaqının (Aİ) anti-inhisar strukturları dünyanın qabaqcıq axtarış sistemi olan “Google”a qarşı rəsmi ittihamlar sürməyə hazırlaşır.

Bu barədə “The Wall Street Journal” qəzetinə məlumatlı mənbə bildirib.

Mənbənin sözlərinə görə, “Google” şirkətinə anti-inhisar qanunvericiliyini pozmaqla bağlı rəsmi ittihamlar irəli sürmək qərarı aprelin 14-də Aİ-nin rəqabət məsələləri üzrə komissarı Marqret Vestaqer tərəfindən qəbul olunub. Avropa Komissiyasının prezidenti Jan-Klod Yunker də bu qərarı dəstəkləyib.

Qeyd olunur ki, ittihamlar 5 il ərzində aparılan araşdırmalara əsasən irəli sürüləcək. Məsələ ondadır ki, Aİ “Google” axtarış sisteminin insanları özünün səyahət və ticarət servislərinə yönəltdiyini, reklam vermək barədə müqavilə bağlayan şirkətlərə isə başqa rəqib platformalara müraciət etməyi məhdudlaşdırdığını, rəqib saytlardan kontent mənimsədiyini hesab edir.

“Google”un 6 milyard ABŞ dollarından çox cərimə olunacağı gözlənilir.Trend

Ölkə.Az