Danimarkada terror təhlükəsi

Kopenhagendə yeni terakt təhdidlərini əks etdirən vərəqələr tapılıb.

Ölkə.Az xəbər verir ki, Danimarkanın paytaxtı Kopenhagendə naməlum şəxslər şəhərin müxtəlif yerlərində terakt təhdidlərini özündə əks etdirən vərəqələr yayıblar.

Terrorçular ölkədə 14 fevral hadisələrini kölgədə qoya biləcək terror aktlarınə həyata keçirəcəklərini bildiriblər. Hüquq-mühafizə orqanları sözügedən faktla bağlı təhqiqatlara başlayıblar. Bu işə Təhlükəsizlik və əks-informasiya xidməti də qoşulub.

Xatırladaq ki, fevralın 14-də Kopenhagen polisi əvvəlcə “Krudtenden” kafesində “İncəsənət, küfr və söz azadlığı” mövzusunda müzakirələr zamanı atışma baş verdiyini elan edib. Sonra şəhərin sinaqoqlarından birində atışma olub. Nəticədə iki nəfər həlak olub, altı nəfər yaralanıb.

Cinayətkarların tutulması üçün Kopenhagen səmasına polis helikopterləri qaldırılıb, şəhərin mərkəzinə xüsusi təyinatlı dəstələr cəlb edilib. Sakinlərə zərurət olmadığı təqdirdə küçəyə çıxmamaları məsləhət görülüb.

Rəşid Mustafazadə

Ölkə.Az