Yəməndə dinc sakinlər həlak oldu

Dinc sakinlər hava hücumlarının qurbanına çevrilib.

Ölkə.Az "Reuters" agentliyinə istinadən xəbər verir ki, Səudiyyə Ərəbistanının rəhbərlik etdiyi koalisiyanın hərbi təyyarələri Səna şəhəri üzərinə hava zərbələri endiriblər. Nəticədə 10 dinc sakin dünyasını dəyişib.

Bu barədə məlumat hadisə şahidləri tərəfindən verilib. Bundan əlavə, Səna yaxınlığında yerləşən hərbi bazaya da hava zərbələri endirilib. Husilərin nəzarət etdiyi "Saba" informasiya agentliyinin məlumatına əsasən, hava zərbələri nəticəsində həlak olanların sayı 20-i, yaralananların isə 50 olub.

Xatırladaq ki, Səudiyyə Ərəbistanı martın 25-də husilərin Yəməndə ölkənin cənub əyalətlərinə irəliləməsinin qarşısını almaq və BMT-nin rəsmi olaraq tanıdığı prezident Əbd Rəbbi Mənsur Hadinin yenidən hakimiyyətə gətirilməsi məqsədilə Yəmənə qarşı hava hücumlarına başlayıb. 10 ərəb dövləti və ABŞ "Qətiyyət fırtınası" adlanan bu hərbi əməliyyatı dəstəkləyib.

Husilər ötən ilin sentyabrından Yəmənin paytaxta hücum edib, Mənsur Hadi hakimiyyətini devirərək paytaxt Sənanı nəzarətə götürüb. O, ötən ay ölkənin cənubundakı Ədən şəhərinə sığınıb. Üsyançılar cəbun regionlarına irəlilədiyinə görə onun artı ölkədən çıxdığı deyilir. Mənsur Hadi BMT Təhlükəsizlik Şurası və Ərəb Dövlətləri Liqasından husiləri dayandırmaq üçün hərbi yardım istəmişdi.

Rəşid Mustafazadə

Ölkə.Az