Tiflis İrəvana etiraz etməyə hazırlaşır

“Təsdiq olunsa, biz əlbəttə adekvat reaksiya verəcəyik”.

Osetiya KİV-də yayılmış Ermənistan parlamentinin spikeri və Tsxinvali rejiminin nümayəndələri arasında görüş barədə məlumatlar təsdiqini tapsa, Gürcüstan tərəfi adekvat reaksiya verəcək.

Ölkə.Az Oxu.az-a istinadla xəbər verir ki, bu barədə Gürcüstan XİN-nin spikeri David Kereselidze bu gün keçirdiyi brifinqdə deyib.

“Bu məlumatı Osetiya tərəfi yayıb. Digər mənbə aşkar etməmişik. İnformasiya təsdiq olunmayıb. Bu barədə bizim səfirlik məlumatlıdır. Biz bu məlumatın həqiqətə nə qədər uyğun olub olmamasını dəqiqləşdiririk”, - Kereselidze bildirib.

O qeyd edib ki, məlumat təsdiqini tapsa, Gürcüstan tərəfi adekvat reaksiya verəcək.

“Əgər məlumat həqiqətə uyğun olsa, o zaman biz əlbəttə ki, bütün vasitələrlə adekvat reaksiya verəcəyik. Reaksiya mütləq olacaq”, - XİN-nin spikeri deyib.

Reaksiya formalarına gəlincə, Kereselidze qeyd edib ki, müxtəlif formalar mövcuddur və onların arasında nota, etiraz, demarş, müraciət, məsləhətləşmə və səfirlə görüş var.

“Bu məlumatın nə qədər doğru olduğuna baxacağıq. Qabağa qaçmamalıyıq”, - Kereselidze vurğulayıb.

Ölkə.Az