Pizza sifariş etməklə ölümdən xilas oldu

Görünməmiş hadisə.

Ölkə.Az "ABC News"a istinadən xəbər verir ki, ABŞ Florida ştatının Eyvon Park şəhərində yaşayan qadın pizza sifariş verməklə birlikdə yaşadığı şəxsin girovluğundan azad edilib.

Bildirilir ki, 25 yaşlı Şeril Treduey adlı qadından başqa evdə 3 uşaq da var idi. Onların 26 yaşlı atası Etan Nikerson mübahisədən sonra qadının telefonunu alıb və bıçaqla təhdid edib.

"Qadın bir gün boyu onun girovluğunda olub", - deyə polis əməkdaşları qeyd edib.

Bir neçə saat sonra Treduey uşaqların ac olduğunu əsas gətirərək Nikkersonu evə pizza sifariş verməyə inandıra bilib. Qadın xüsusi tətbiq vasitəsilə sifariş edib və əlavə qeydlər bölməsinə "911, girov, yardım edin!" yazıb. Müəssisənin əməkdaşı sözügedən mesajı görərək, polis çağırıb.

"Mən 28 ildir ki, burada işləyirəm, ancaq heç vaxt bu cür halla rastlaşmamışam", - deyə Kensi Hemilton bildirib.

Hüquq-mühafizə orqanları hadisə yerinə gələndə Treduey övladlarından biri ilə evdən qaça bilib. Digər iki uşaq isə ataları ilə birlikdə evdə qalıblar. Danışıqlar zamanı Nikerson polisə təslim olub.

Hazırda onunla bağlı araşdırmalar aparılır.

Ölkə.Az