Nigeriyada dəhşət: terrorçular kollecə hücum etdi

Qurbanlar var.

Ölkə.Az xarici mətbuata istinadən xəbər verir ki, "Boko Haram" terror qruplaşmasının üzvləri olduğu ehtimal olunan yaraqlılar səhər saatlarında Nigeriyanın şimal-şərqindəki Yoba ştatında yerləşən kollecə hücum ediblər.

Əldə olunan məlumatlara əsasən, Potiskum şəhərində fəaliyyət göstərən təhsil müəssisəsinin 6 tələbəsi ağır yaralanıb. Nigeriya ordusunun əsgərləri və polislər kollecin ərazisinə daxil olaraq, yaraqlılarla atışmaya başlayıblar.

Şahidlərin sözlərinə görə, yaraqlılar "College оf Administrative and Business Studies" kollecinin darvazasına yaxınlaşaraq atəş açıblar və mühafizə əməkdaşı postunu tərk edərək qaçıb. Bundan sonra naməlum şəxslər kollecin yataqxanasında bomba partladıblar. Hücum zamanı tələbələrin əksəriyyətinin auditoriyalarda olduğu deyilib.

Atışmadan sonra yerli sakinlər yaraqlılardan birini ələ keçirərək döyüblər. Tutulan yaraqlının yanında qurşağında partlayıcı qurğu olan ortaq olub. O, qurğunu işə salıb və yerindəcə keçinib.
Xatırladaq ki, 27 apreldə Nigeriya və qonşu ölkələrdə aktiv şəkildə fəaliyyət göstərən “Boko Haram” terrorçu qruplaşması adını dəyişmişdi. Bildirilib ki, bundan sonra terrorçu qruplaşma “İslam dövlətinin Qərbi Afrika əyaləti” (Islamic State's West Africa Province, ISWAP) adlanacaq.

Qeyd edək ki, Boko Haram ( Camaat’u Əhlus-Sünnə lid-Da’va vəl Cihad) Nigeriyanın radikal islam sektasıdır. O, 2002-ci ildə Nigeriyanın şimalında Məhəmməd Yusif adlə şəxs tərəfindən yaradılıb. Təşkilatın əsas məqsədi bütün Nigeriya ərazisində şəriətin tətbiqi və Qərb həyat tərzinin silinməsidir. 2014-cü ilin may ayında BMT Təhlükəsizlik Şurası tərəfindən terror təşkilatları siyahısına salınıb.

Rəşid Mustafazadə

Ölkə.Az