Rusiyada metroda nikah mərasimləri keçiriləcək

Rusiyanın paytaxtı Moskvada cütlüklərin metroda nikah mərasimi keçirməsinə icazə veriləcək.

“Ölkə.az” Sputnik”ə istinadla xəbər verir ki, bunu Moskva bələdiyyəsinin müavini Anastasya Rakova deyib. O, şəhər metrosunun “Mayakovski” stansiyasında və “Severnıy Reçnoy Vokzal” sərnişin  terminalında evlənməyə icazə veriləcəyini bildirib.

“2019-cu ildən bəri Moskvada ən fərqli və ən gözəl yerlərdə nikah bağlanmasına istiqamətlənmiş layihə aktiv şəkildə inkişaf etdirilir. Məkanların siyahısı da davamlı olaraq yenilənir. Bu il yeni layihəyə başlamağa qərar verdik, nəqliyyat sahələrində evlənmək mümkün olacaq. Bu il nikahlar “Severnıy Reçnoy Vokzal” sərnişin terminalında və “Mayakovski” metro stansiyasında bağlana biləcək”.

“Mayakovski” stansiyasında sərnişin axınına mane olmamaq üçün nikah mərasimlərinin gecə saatlarında keçiriləcəyi qeyd olunub.

Rakova Moskvadakı fərqli məkanlarda son 2 ildə 13 mindən çox cütlüyün evləndiyini söyləyib.