Moskvanın iaşə obyektləri \"kovidsiz\" rejimdə işləyəcək

İyunun 28-dən Rusiya paytaxtının iaşə obyektlərinə yalnız koronavirusa qarşı peyvənd olunmuş, yaxud son 6 ay ərzində koronavirusa yoluxub sağalmış, eləcə də COVID-19 testinin mənfi nəticəsi olan şəxslərə xidmət göstərəcək. Belə testlər yalnız 3 gün ərzində qüvvədə olacaq. Bu barədə Moskva meri Sergey Sobyanin məlumat verib.

Eyni zamanda, restoran və kafelər kağız sertifikatlar qəbul etməyəcəklər. Müştərilər yalnız xüsusi QR kod təqdim etməlidir. Moskva meri bu tədbiri yeni lokdauna getməmək üçün qabaqlayıcı tədbir kimi qiymətləndirib.

Turistlər və Rusiya paytaxtının qonaqları da koronavirus testi verməli və yeni qaydalara uyğun sertifikat almalıdırlar.

Qeyd edək ki, ötən gün Moskvada koronavirusdan 88 nəfər həyatını itirib. Bu, pandemiya dövrü ərzində ən yüksək göstəricidir. Ümumilikdə Rusiya paytaxtında indiyədək 21 686 xəstə koronavirusun qurbanı olub. İyunun 22-də 6 534 yeni xəstə aşkar edilib.