ABŞ buna görə İran və Rusiyaya müqavimət göstərə bilməyəcək

WSJ: "Neft ixracının qadağan olunması ABŞ-ın Rusiya və İrana müqavimət göstərməsinə mane olur"

Ölkə.Az xəbər verir ki, bu fikirlər nüfüzlü "The Wall Street Journal" nəşrində yer alıb.

ABŞ-ın keçmiş müdafiə naziri, Mərkəzi Kəşfiyyat İdarəsinin eks-rəhbəri Leon Panetta və prezidentin milli təhlükəsizlik üzrə sabiq müşaviri Stiven Hedli tərəfindən qələmə alınan məqalədə deyilir ki, neftin ixracatına qadağanın tətbiq edilməsi ABŞ-ın milli təhlükəsizliyinə ziyan vurur və Vaşinqton şüurlu şəkildə Rusiya, İran və digər ölkələrdən gələn təhlükələrə müqavimət göstərə bilmək üçün istifadə edə biləcəyi vasitələrdən imtina edir.

Müəlliflər bəyan edir ki, ABŞ milli qətiyyət və ABŞ-ın Asiya və Avropadakı yaxın müttəfiqlərinin qətiyyətini tələb edən bir sıra qlobal təhlükələrlə üzləşib. İddia olunur ki, bunlara İranın regionun hegemonuna çevrilməsinə aparan addımlar, Rusiyanın Ukraynaya qarşı fəaliyyəti, Yaxın Şərq və Şimali Afrikada radikal islamçıların apardığı münaqişələr daxildir.

Amerikanın məqsədlərinə çatmasının yollarından biri iqtisadiyyatla bağlıdır və əsasən ABŞ-ın müttəfiq və dost dövlətlərinin enerji mənbələrinə çixışının təmin edilməsindədir. Bu çıxış isə amerika neftinin ixrac olunması üzərinə qoyulan qadağa ilə kilidlənmiş olur.

Panetta və Hendli qeyd edir ki, ABŞ qeyri-stabil enerji mənbələri asılılığından azad olsa da, xüsusən Avropadakı müttəfiqlər eyni səviyyədə azadlığa malik deyillər. Onların sözlərinə əsasən, ABŞ bütün dünyada təhlükəsizlik sahəsində maraqlarının dəstəklənməsi üçün neft və qaz ehtiyatlarından istifadə etməyə başlamalıdır.

"ABŞ demokratiyanın böyük cəbbəxanası olaraq qalır. O, həm də böyük enerji cəbbəxanasına çevrilməlidir", - deyə məqalə müəllifləri qeyd edir.

Rəşid Mustafazadə

Ölkə.Az