Ermənistan parlamenti qərara gələ bilmir

Ermənistan parlamenti bir neçə gündür ki, parlament spikerinin 3-cü müavinini seçə bilmir.

“Ölkə.Az”a erməni mediasına istinadən xəbər verir ki, parlamentin müxalif “Ermənistan” fraksiyası üçüncü dəfə vitse-spiker postuna İşxan Saqatelyanın namizədliyini irəli sürsə də, deputatlar ona səs vermirlər. Bu səbəbdən də parlament rəhbərliyi formalaşa bilmir. Hətta avqustun 5-də Ermənistan parlamentinin iclasında Saqatelyanın namizədliyi iki dəfə irəli sürülsə də, lazımi səsi toplaya bilmədiyindən vitse-spiker seçilə bilmir.

Hakim “Vətəndaş müqaviləsi” partiyasından olan deputat Vaqarşak Akopyan açıqlamasında deyib ki, İşxan Saqatelyan ürəyimizcə olan namizəd deyil və ona görə də səs vermirik.

Hakim partiyadan vitse-spiker Ruben Rubinyan isə ironiya ilə müxalifətçi deputatalara deyib: “Bu ki, qeyri-ciddilikdir. Mən heç belə gözləməzdim... Məsələn, özüm iki dəfə İşxan Saqatelyana səs vermişəm. Əgər bunu mən bacarıramsa, siz də bacarmalısınız”.

Bununla da Rubinyan müxalifətçilərə işarə edib ki, müxalifətçi deputatlardan kimlərsə müxalifətin namizədinə səs vermir.

Mürtəza

Ölkə.Az