İŞİD qarşı yeni hücum hazırlanır

İraq ordusu və şiə könüllüləri İŞİD üzərinə əks-hücuma hazırlaşır.

İraq hökümətindən verilən açıqlamada bildirilir ki, bir neçə gün əvvəl Ramadi şəhərini ələ keçirən İŞİD-mövqelərinə hücum hazırlanır. İraq qüvvələrinin Husayba şəhəri yaxınlığında cəmləşdiyi qeyd olunur.

Anbar əyalətinin mərkəzi olan Ramadi şəhəri paytaxt Bağdaddan 110 kilometr aralıda yerləşir və onun süqutu hökuməti bərk narahat edir. İŞİD-in son hücumları zamanı 500 nəfər ölüb, 40 min sakin isə şəhərdən qaçqın düşüb. 

İraqın baş nazirinin müavini İŞİD-lə mübarizənin “yerli miqyaslı” məsələ olmadığını deyərək beynəlxalq ictimaiyyəti əməli addımlara səsləyib.

Qeyd edək ki, son günlər İŞİD Suriya və İraqda ciddi hərbi irəliləyişə nail olub. Terrorçular İraqda Ramadi, Suriyada isə qədim Palmira şəhərini ələ keçiriblər. Həmçinin Suriya-İraq sərhədində Dəməşqin nəzarətində qalan sonuncu keçid məntəqəsinin də terrorçular tərəfindən tutulduğu bildirilir.