Müsəlman Alimlər Birliyindən BMT-yə ÇAĞIRIŞ

Dünya Müsəlman Alimlər Birliyi BMT-yə çağırış edib.

Ölkə.Az “Star” qəzetinə istinadla xəbər verir ki, birlik Hindistanın Assam əyaləti başda olmaqla müsəlmanların məruz qaldığı şiddəti qınayaraq BMT-dən vəziyyətə müdaxilə edilməsini istəyib.

Assam əyalətində müsəlman ailələrin deportasiyası zamanı 3 nəfərin ölümündən sonra Dünya Müsəlman Alimlər Birliyi yazılı açıqlama yayımlayıb.
Açıqlamada deyilir:

“Hindistanda, xüsusən də Assam əyalətində müsəlmanların məruz qaldığı sistematik şiddəti, qətliamları, hüquqlarına, dini azadlıqlarına və sosial həyat tərzinə qarşı zülmlərlə evlərindən məcburi şəkildə çıxarılmalarını qınayırıq”.

Açıqlamada həmçinin Hindistan hökumətindən müsəlman azlığın dini və sosial hüquq və azadlıqlarına hörmət edilməsi tələb edilib.

Qeyd edək ki, Assam mətbuatı dövlətə aid bəzi ərazilərdə tikildiyini əsas gətirərək rəsmi qərarla müsəlman azlıqlardan olan 20 min nəfəri evindən çıxmağa məcbur edib.

Xatırladaq ki, Hindistanda ümumilikdə 154 milyon müsəlman yaşayır. Bu da Hindistan əhalisinin 14%-nə bərabərdir.

Billurə