Paşinyan Ermənistanı Azərbaycanın təsirində olan ölkəyə çevirmək istəyir  - Vahe Ovanisyan

Nikol Paşinyan ən yaxşı halda Ermənistanı Azərbaycanın təsir dairəsində olan Karib adalarındakı Sent Kitts və Nevis federasiya tipli bir ölkəyə çevirmək niyyətindədir.

“Ölkə.Az” xəbər verir ki, bunu “Hetk.am”a açıqlamasında Alternativ layihələr qrupunun eksperti Vahe Ovanisyan  prezident Armen Sarkisyanın vətəndaşlığı və baş nazir Nikol Paşinyanın buna cavabı ilə bağlı dərc etdiyi məlumatları şərh edərkən deyib.

“Məlum oldu ki, Ermənistan prezidenti Sent-Kits və Nevis vətəndaşı olub və bu məlum olan kimi o, tələsik ölkədən mühacirət edir və Londondakı öz mənzilindən istefa mətnini onun rəhbərlik etdiyi ölkəyə teleqrafla göndərir”, - ekspert qeyd edib.

Paşinyana gəldikdə isə ekspert əlavə edib ki, baş nazirin Ermənistanın yaxın və uzunmüddətli gələcəyi ilə bağlı baxışı sırf Azərbaycan-Türkiyə maraqları sferasındadır.

Ermənistanda müxalifətin fəaliyyətinə gəldikdə isə ekspert qeyd edib ki, müxalifət təşkilati baxımdan sıfır səviyyəsində olduğundan ciddi ictimai proses yoxdur:

“Ölkədə yeni reallıq, ciddi böhran yaranıb… Odur ki ölkədə ümumi narazılıq və narahatlıq şəraitində Ermənistanın Azərbaycan-Türkiyənin Sent Kitsinə və Nevisinə çevrilməsini dayandıracaq ciddi proses yoxdur”.

Mürtəza
Ölkə.Az