Qazaxıstan tarixi addım atdı

"Qazaxıstanı beynəlxalq hüquq normalarına müvafiq olaraq ticarət siyasətini aparan əlverişli investisiya iqlimi olan ölkə kimi tanıyıblar"

Ölkə.Az xarici mətbuata istinadən xəbər verir ki, Qazaxıstan rəsmi olaraq Ümumdünya Ticarət Təşkilatına (World Trade Organization) qoşulub.

Ölkə prezidenti Nursultan Nazarbayev bu münasibətlə vətəndaşlara müraciət edib. Müraciətdə deyilir ki, Cenevrədə işçi qrupun final iclasında Qazaxıstanın Ümumdünya Ticarət Təşkilatına qoşulması ilə bağlı danışıqların yekunlaşdırıldığı elan olunub.

"Bu, bizim üçün tarixi hadisədir. Qazaxıstan Ümumdünya Ticarət Təşkilatının 162-ci üzvü olacaq. Dünyanın bütün iri iqtisadçıları Qazaxıstanı beynəlxalq hüquq normalarına müvafiq olaraq ticarət siyasətini aparan əlverişli investisiya iqlimi olan ölkə kimi tanıyıblar", - deyə prezident qeyd edib.

Onun sözlərinə görə, Ümumdünya Ticarət Təşkilatında üzvlük müəssisələrə xarici bazarlara çıxış, istehlakçılarara isə geniş mallar seçimini təmin edərək ölkə iqtisadiyyatı qarşısında yeni üfüqlər açır.

Xatırladaq ki, Ümumdünya Ticarət Təşkilatı  1995-ci ildə Tariflər və Ticarət üzrə Baş Sazişi varisi kimi yaradılıb. O, millətlər arasında ticarətin qlobal qaydalarını müəyyənləşdirən yeganə beynəlxalq təşkilatdır. ÜTT-nin əsas funksiyası ticarətin tarazlı, maneəsiz, ehtimal olunan şəkildə və azad aparılmasını təmin etməkdir. Məqsəd üzv ölkələrin əhalisinin rifah halını yaxşılaşdırmaqdır.

Rəşid Mustafazadə

Ölkə.Az