Putin söz vermişdi: Müharibədə sizə kömək edəcəm

İki uruqvaylı jurnalist ölkənin keçmiş prezidenti Xose Muxikanın tərcümeyi-halını nəşr ediblər. 

Mayda çıxan həmin bioqrafiya Latın Amerikasında geniş və sərt müzakirə edilib. Çünki bir çoxlarının fikrincə, həmin kitab Muxikanın latın amerikalı solçularla münasibətlərini ifşa edir. Həmin şəxslərin içərisində Venesuelanın keçmiş prezidenti Uqo Çaves, Braziliyanın keçmiş prezidenti Lupa da Silva, Kastro qardaşları da var.

Lakin bu tərcümeyi-hal tək Muxikanın münasibətləri ilə yadda qalmayıb. Məsələ burasındadır ki, orada Rusiya prezidenti Vladimir Putinin də adı hallanır. Bildirilir ki, Venesuela Kolumbiya ilə müharibə edəcəyi təqdirdə Putin Uqo Çavesə kömək təklif edib.

Nəşrda Uqo Çavesin Muxikaya bu haqda danışdıqları yer alıb. Kitabın bir yerində isə belə yazılıb: "Çaves Muxika ilə söhbəti zamanı deyib ki, Rusiya prezidenti konflikt yaranacağı təqdirdə ona öz məsləhətləri ilə kömək etməyi təklif edib. Putin Kolumbiyanın hərbi arsenalı, onlara qarşı mübarizə aparmaq üçün göndərə biləcəyi Rusiya texnikası haqqında məlumatlar verə biləcəyini deyib".

Düzdür, Venesuela ilə Kolumbiya arasında müharibə olmadı. Amma Uqo Çaves 14 illik prezidentliyi dövründə milyardlarla dollarlıq Rusiya silahı aldı. ABŞ isə 2000-ci ildən Kolumbiyaya təhlükəsizliyini qorumaq üçün 9 milyard dollardan çox yardım göstərib.

Qeyd edək ki, Vensuela ilə Kolumbiyanın sərhədində tez-tez toqquşmalar baş verir. Narazı kolumbiyalılar sərhədin hər iki tərəfində fəaliyyət göstərirdilər. Alvaro Uribe isə Kolumbiyanın prezidenti olan zaman iddia edirdi ki, Venesuela hakimiyyəti kolumbiyalı üsyqançıların fəaliyyətinə göz yumur, hətta bəzi hallarda onlara kömək də edir.