Türkiyənin maliyyə naziri: \"Heç bir qonşumuzun sıxıntı yaşamasını arzulamırıq\"

Bir vaxtlar maliyyə problemləri səbəbiylə tez-tez borc axtarışına çıxan Türkiyə son 12 ildə Yunanıstanı xilas edəcək səviyyəyə çatıb.

Ölkə.Az xarici mətbuata istinadən xəbər verir ki, Türkiyənin maliyyə naziri Məhmət Şimşək böhran içində olan Yunanıstan üçün borc verilməsi məsələsi ilə bağlı danışıb. O, Türkiyənin büdcə baxımından respublika tarixinin ən güclü dövrünü yaşadığını bildirib:

"Baş nazirimiz təlimat verərsə, işləməyə başlayacağıq, maliyyə və imkanlarımız var. Heç bir qonşumuzun iqtisadi və ya başqa sıxıntı yaşamasını arzulamırıq. Respublika tarixində büdcə baxımından ən güclü dövrümüzü yaşayırıq və Türkiyənin ictimai maliyyəsi çox güclüdür. Həm Yunanıstanın, həm də digər qonşu dövlətlərin sıxıntılarının ən qısa zamanda həll edilməsini arzu edirik”, - deyə Şimşək qeyd edib.

Xatırladaq ki, Yunanıstan iyunun 30-dək Beynəlxalq Valyuta Fonduna (BVF) 1.5 milyard avro məbləğində borcunu qaytarmaq barədə öhdəliyini yerinə yetirməyib. Dünən isə Yunanıstan hökuməti beynəlxalq kreditorların şərtlərini qəbul etməyə razılaşıb.

Ölkə.Az