Mətn ölçüsü:
  • 100%

Coni Dep və Amber Hördün içərisində olduğu böyük oyun - Dünyada yeni "cərəyan" yaranır

Son zamanlar amerikalı aktyor Coni Deplə keçmiş həyat yoldaşı, aktrisa Amber Hördün məhkəməsi bütün dünyada müzakirələrə səbəb olub.

Ölkə.Az xarici KİV-ə istinadla xəbər verir ki, aprelin 11-də başlayan və 6 həftə davam etməsi planlaşdırılan dinləmələrdə hər iki tərəf qarşı tərəfi 15 aylıq evlilikdə baş verən zorakılığın səbəbkarı olmaqda ittiham edir.

İki aktyorun tanışlığı 2009-cu ildə baş rolları paylaşdıqları “Ehtiras Gündəlikləri” filminin çəkilişləri zamanı başlayıb. Məhkəmə sənədlərinə görə, Hörd və Deppin münasibətləri 2011-ci ilin sonu və 2012-ci ilin əvvəlində başlayıb.  2015-ci ildə cütlük Los-Ancelesdəki evlərində 20-25 qonağın qatıldığı toy mərasimi ilə həyatlarını birləşdirib.

2016-cı ildə Hörd boşanma ərizəsi ilə yanaşı, Depə qarşı müvəqqəti həbs qətimkan tədbiri görülməsini istəyib. Depin münasibətləri boyunca ona fiziki təzyiq göstərdiyini də iddia edən Hörd, aktyorun bu dövrlərdə tez-tez narkotik və ya spirtli içkinin təsiri altında olduğunu ifadə edib.

Amber Hörd Deppin ona qarşı fiziki zorakılıq törədiyini iddia edir

Boşanma 2017-ci ildə yekunlaşıb. “The Hollywood Reporter” yazıb ki, boşanma müqaviləsinə həm Hörd, həm də Depin münasibətləri və ayrılıqları haqqında mənfi danışmasını qadağan edən bənd əlavə edilib.

Lakin Hördün 2018-ci ildə Washington Post üçün yazdığı "Seksual zorakılığa qarşı çıxış etdim və mədəniyyətimizin qəzəbinə tuş gəldim. Bu dəyişməlidir" başlıqlı məqalədə ailədaxili zorakılıq hadisələrində qadınlara qarşı rəftardan bəhs edib. 

Amber Hörd Coni Depin onun paltardəyişmə otağını dağıtdığını iddia edərək bu fotonu sübut kimi məhkəməyə təqdim edib.

Hörd sözlərində keçmiş həyat yoldaşı Coninin adını çəkməsə də, bu onun məqaləyə görə Hörda qarşı 50 milyon dollarlıq böhtan iddiası qaldırmasına mane olmayıb. Depin 2019-cu ildə verdiyi ərizədə Hördün məişət zorakılığının qurbanı olmadığı vurğulanıb.

Hördün ittihamları "aktrisanın reklam etmək üçün uydurduğu mükəmməl saxtakarlıq" kimi qiymətləndirilib. 

Coni Dep məhkəmədə A.Hördün onu necə vurmasından danışarkən

Daha sonra Amber Hörd 2021-ci ilin yanvarında Depə qarşı 100 milyon dollarlıq "böhtan" iddiası da qaldırıb.

“Daily Mail” 2020-ci ilin yanvarında Hördün Depi vurduğunu etiraf etdiyi bəzi telefon yazılarını da dərc edib.

Hazırda “Fairfax”da baxılan işdə münsiflər heyəti həm Dep, həm də Hörd tərəfindən qaldırılan işlərə qərar verəcək.

Sözügedən məhkəməişində tərəflərin ikisinin də məşhur olması cəmiyyəti də ikiyə bölüb. 

Türkiyəli bədən dili üzrə mütəxəssis Aşkım Kapışmak isə hesab edir ki, tərəflərin yaşadıqları real olsa belə, bu hadisələrin təqdimat şəkli böyük bir oyunun parçası kimidir:

“Düşünürəm ki, bir müddət sonra kişilər üçün platformalar qurulacaq. Onlar kişi hüquqları ilə bağlı məhkəmə işlərini gündəmə gətirəcəklər. Dünyanı bu məhkəməyə baxmağa vadar etmələrinin böyük səbəbi olmalıdır. Dünya niyə bu işə baxır? Qadın hüquqlarına qarşı yaradılan kişi hüquqları anlayışını ortaya qoyacaqlar. Hazırda hər iki tərəfin böyük piarları var.
İş bitəcək, hər şey unudulacaq, ikisi də böyük işlərə görüb, yoluna davam edəcəklər. Amma bu işi dünyaya nümayiş etdirmək niyyətinə baxmaq lazımdır. Sanki biz gələcəkdə güclərin haqqı uğrunda küçələrə çıxan insanların şahidi olacağıq”,- deyə o bildirib.

Billurə Yunus