Mətn ölçüsü:
  • 100%

Putin NATO üzvü olmaq istəyən o dövləti hədələdi: "Səhv olardı..."

Finlandiya Prezidenti Sauli Niinistö ölkəsinin NATO-ya üzvlük ərizəsini Rusiya Prezidenti Vladimir Putinlə telefonda müzakirə edib. 

Ölkə.Az xarici KİV-ə istinadla xəbər verir ki, bu barədə Finlandiya Rəyasət Heyəti məlumat yayıb.

Məlumata görə, danışıq zamanı Prezident Niinistö Putinə bildirib ki, Finlandiya yaxın bir neçə gün ərzində NATO-ya üzvlük üçün müraciət etmək qərarına gəlib. 

Finlandiyanın NATO-ya üzv olmaqla öz təhlükəsizliyini gücləndirəcəyini bildirən sədrliyin bəyanatında deyilir:

“Finlandiya gələcəkdə Rusiyanın qonşusu olmağın praktiki problemlərini dəqiq və peşəkar şəkildə həll etmək istəyir” .

Bildirilib ki, görüş Finlandiyanın müraciəti əsasında keçirilib.

Kremlin bəyanatında isə Putinin Finlandiyanın qərarını “səhv” adlandırdığı vurğulanıb:

"Finlandiyanın NATO-ya üzvlük üçün müraciət etmək niyyəti ilə bağlı açıq fikir mübadiləsi aparılıb. Vladimir Putin vurğulayıb ki, Finlandiyanın təhlükəsizliyinə heç bir təhlükə olmadığı üçün ənənəvi hərbi neytrallıq siyasətindən imtina etmək səhv olardı”.

Qeyd olunub ki, Finlandiyanın xarici siyasətində belə bir dəyişiklik Rusiya ilə Finlandiya arasında uzun illərdir mehriban qonşuluq və əməkdaşlıq ruhunda qurulmuş qarşılıqlı faydalı münasibətlərə mənfi təsir göstərə bilər.

Liderlər Ukraynadakı vəziyyəti də müzakirə ediblər. Açıqlamaya görə, Putin Kiyev administrasiyasının dialoqda maraqlı olmadığı üçün Ukrayna ilə danışıqların dayandırıldığını bildirib.

Billurə Yunus