Abramoviçin Portuqaliyadakı 10 milyonluq evinə həbs qoyulub
"Ölkə.az" xəbər verir ki, bu barədə mayın 14-də “Público” qəzeti məlumat yayıb.
Nəşrin yazdığına görə, Rusiyanın Ukraynaya təcavüzündən 15 gün əvvəl Abramoviçin investisiya holdinqinə məxsus “Millhouse Views” MMC bu əmlakı satmağa cəhd edib. Lakin Portuqaliyanın Caixa Geral de Depósitos dövlət bank korporasiyası bu barədə ölkə polisinə məlumat verib.
Portuqaliya Xarici İşlər Nazirliyinin tələbi ilə martın 25-dən əmlakın qeydiyyatı dondurulub.
Ukraynada müharibə başlayandan sonra Roman Abramoviç Avropa İttifaqı və Böyük Britaniyanın sərt sanksiyalarına məruz qalıb. Onun aktivləri, o cümlədən Londonun “Çelsi” futbol klubuna yönələn maliyyə aktivləri dondurulub. Daha sonra Abramoviç klubu amerikalı iş adamları Todd Boeli və Mark Valter, isveçrəli milyarder Hansjörg Wyss və Clearlake Capital investisiya şirkətinin daxil olduğu konsorsiuma satmaq üçün müqavilə imzalayıb.
Aprelin ortalarında Britaniyanın Cersi adasının məhkəməsi Roman Abramoviçlə bağlı olan 7,3 milyard dollarlıq aktivləri dondurub. Bu, oliqarxın 13,9 milyard dollar dəyərində qiymətləndirilən sərvətinin yarısından çoxdur. Bundan əlavə, Fransa hakimiyyəti Abramoviçin Rivieradakı 120 milyon dollarlıq malikanəsini müsadirə edib. Bizimyol.info xəbər verir ki, "Daily Mail"in verdiyi məlumata görə, bu, Abramoviçdən müsadirə edilən 12 fransız iqamətgahından biridir.
Eyni zamanda, rusiyalı milyarder həbs təhlükəsi altında olan iki lüks yaxtanı Avropa İttifaqı ölkələri hüdudlarından kənara aparmağa nail olub. (bizimyol.info)
