İranla Qərb tarixi razılaşma astanasında

İranla “altılıq” ölkələri arasında Tehranın nüvə proqramına dair razılaşma üç mərhələli prosesdə ola bilər. İran xarici işlər nazirinin müavini Abbas Araqçi proqrama dair Vyanada keçirilən görüşlərə münasibətində belə bir açıqlama verib.

ANS TV-nin məlumatına görə, nüvə proqramına dair razılaşma bütün nümayəndələr tərəfindən imzalanmaya bilər. İranın xarici işlər nazirinin müavini Abbas Araqçının sözlərinə görə, burada ən vacib məsələ Təhlükəsizlik Şurasının bu barədə qətnamə qəbul etməsidir. Araqçı deyir ki, bu, razılaşma, əslində, hələ müqavilə deyil, sadəcə birgə atılacaq addımların planıdır:

“İlkin mərhələdə tərəflər razılığa gəldiklərinə dair bəyanat səsləndirdikdən sonra Təhlükəsizlik Şurası bu barədə qətnamə qəbul etməlidir. Daha sonra danışıqlarda iştirak edən ölkələrdə də bu barədə qanun qəbul olunmasını gözləyəcəyik. Bu proseslər tamamlandıqdan və tərəflər hazır olduqlarını ifadə etdikdən sonra razılaşma baş tutmuş olacaq. Bundan sonra isə qarşı tərəf İrana qarşı tədbiq olunan sanksiyaları aradan qaldırmalı və İran da öz növbəsində öz üzərinə düşən öhdəlikləri yerinə yetirməlidir. 

İranın xarici işlər naziri Məhəmməd Cavad Zərif isə Avstriyanın paytaxtı Vyanada İranın nüvə proqramına dair keçirilən danışıqların yekunu ilə bağlı açıqlamasında deyib ki, “altılıq” ölkələrilə yekun razılaşmaya indiyə kimi bu qədər yaxın olmayıblar. Lakin sonda razılaşmanın olacağına dair heç bir zəmanət də vermək olmaz.

Nazir deyib ki, yekun razılaşma üçün qarşı tərəf kompromisə getməyi bacarmalıdır. Danışıqlar iyulun yeddisinədək davam edəcək və razılaşma da elə o vaxt əldə edilməlidir.

Əslində “altılıq” ölkələri İranın həsas nüvə fəaliyyətini dayandırmağını istəyirlər. Eyni zamanda onun nüvə silahı əldə etməyəcəyinə əmin olmaq istəyirlər. Qarşılığında iqtisadiyyatını ağır vəziyyətə salan beynəlxalq sanksiyaların qaldırılmasını istəyən İran nüvə fəaliyyətinin sülhməramlı olduğunu iddia edir.

Qərbin razılaşma qarşılığında İrandan əsas tələbi isə Tehranın nüvə proqramının həcmini 70 faiz məhdudlaşdırmaqdır.

Ölkə.Az