Aİ, ABŞ və Böyük Britaniya Rusiya cinayətlərini araşdıran qrup yaradıb

Avropa İttifaqı, ABŞ və Böyük Britaniya Rusiyanın Ukraynaya qarşı apardığı genişmiqyaslı müharibə zamanı törətdiyi hərbi cinayətləri törədənlərin məsuliyyətlə cəlb edilməsi məqsədi ilə Məsləhət Qrupu yaradıb.

“Ölkə.Az” xəbər verir ki, bu barədə ABŞ Dövlət Departamenti müvafiq bəyanat yayıb.

“Məsləhət Qrupu Rusiyanın Ukraynaya qarşı apardığı təcavüz müharibəsi kontekstində törədilən vəhşilikləri məsuliyyətə cəlb etmək üçün Aİ, ABŞ və Böyük Britaniyanın davam edən səylərini gücləndirəcək. Qrup Ukraynaya mühüm tarixi məqamda beynəlxalq dəstək və həmrəylik nümayiş etdirmək üçün Aİ, ABŞ və Böyük Britaniyanın üzərinə götürdüyü öhdəlikləri yerinə yetirəcək”, - bəyanatda deyilir.

Qrupun əsas missiyası Ukrayna Baş Prokurorluğunun bölmələrinə hərbi cinayətlərin araşdırılmasında dəstək olmaq olacaq.

Aİ-nin Xarici Əlaqələr üzrə Ali Nümayəndəsi Jozef Borrell qrupun yaradılmasını şərh edərkən bildirib ki, Rusiyanın Ukraynaya əsassız hərbi təcavüzü zamanı törədilmiş dəhşətli vəhşiliklərə görə məsuliyyət daşıyan bütün şəxslərin məsuliyyətə cəlb olunmasını təmin etmək çox vacibdir.

ABŞ dövlət katibi Entoni Blinken isə bildirib ki, bu təşəbbüs Rusiya hərbçilərinin Ukraynada törətdiyi hərbi cinayətlər və digər vəhşiliklərin sübutlarını sənədləşdirmək, təhlil etmək üçün Baş Prokurorluğun səylərini birbaşa dəstəkləyəcək.

Britaniyanın xarici işlər naziri Liz Truss bildirib ki, tərəflər Ukraynada törədilən vəhşiliklərə görə məsuliyyət daşıyanların məsuliyyətə cəlb olunmasını təmin etməkdə qərarlıdırlar.

Mürtəza
Ölkə.Az