Putin Tsiprasla referendumdan danışdı

Danışıq yunan tərəfinin təşəbbüsü ilə baş tutub.

Ölkə.Az xəbər verir ki, Rusiya Federasiyası prezidenti Vladimir Putin telefon danışığında Yunanıstanın baş naziri Aleksis Tsiprasla referendumun nəticələrini müzakirə edib və Yunanıstan xalqına çətinliklərin dəf olunmasında dəstəyini ifadə edib.

Telefon danışığı yunan tərəfinin təşəbbüsü ilə baş tutub.

"Yunanıstanda keçirilən referendumun yekunları, beynəlxalq kreditorların ölkəyə maliyyə yardımını verməsi və Rusiya-Yunanıstan əlaqələrinin gələcək inkişaf məsələləri müzakirə edilib", - deyə bildirilib.

Bir müddət öncə Rusiya Federasiyasının prezidenti Vladimir Putinin mətbuat katibi Dmitriy Peskov bəyan edib ki, Afina Moskvadan maliyyə yardımı istəməyib.

Xatırladaq ki, bu gün Yunanıstanda ölkə əhalisinin 40%-nin iştirak etdiyi referendum başa çatıb. Yunanıstan Daxili İşlər Nazirliyinin açıqladığı ilkin nəticələrə əsasən, səsverməyə qatılanların 59,7%-i kreditorların tələblərinə “yox” cavabı verib və yalnız 40.3% vətəndaş bu şərtlərlə razılaşaraq “hə”yə səs verib.

Rəşid Mustafazadə

Ölkə.Az