ABŞ-a tonlarla narkotik daşıtdıran xeyirxah "narkobaron"

Pablo Eskobar əfsanəvi kolumbiyalı narkotik qaçaqçısı olub. O, narkotiklərdən əldə etdiyi gəlirin hesabına 1989-cu ildə məşhur "Forbes" jurnalında dünyanın ən varlı yeddinci şəxsi elan edilmişdi.

Ölkə.Az xəbər verir ki, gələcəyin "narkobaronu"nun gənclik dövrü Kolumbiyanın 1970 - 1980-cı illərdə ən təhlükəli şəhərlərindən biri hesab edilən Medellində keçmişdi. O dövrün narko kartellərinin hər biri bu şəhərdə toplanmışdı.

İlk cinayət və yüksəliş

Eskobarın ilk cinayət əməli də bu şəhərdə baş tutub. O maşın və şəhər məzarlığından baş daşlarının oğurlayaraq qonşu şəhərdə satırdı. Xırda oğurluq əməllərindən gözü doymayan Eskobar 1970-ci illərdə narkotik biznesinə başlayıb. Bu sahədən əldə edilən gəlirlərin hesabına qısa müddət ərzində varlanan Pablo Eskobar 1975-ci ildə böyüdüyü şəhərdə olan bütün narko kartellərinin tabe olduğu və o zamanlara baş "narkobaron" kimi tanınan Fabio Restreponu öldürmək göstərişi vermişdi. Ən böyük baronun ölümündən sonra Kolumbiyada həyata keçirilən bütün narkotik transferi əməliyyatları Eskobarın nəzarətinə keçdi.
1976-cı ilin göstəricilərinə əsasən, ABŞ-da satılan narkotik maddələrdən əldə edilən gəlirin 80%-i Eskobarın hesabına yazılırdı.

Ən qüdrətli dövrlərində Medellin karteli ABŞ-a 15 ton kokain keçirirdi. Bu cür partiyanın dəyəri 500 milyon ABŞ dolları idi. Pablo Eskobarın qardaşı Robertonun sözlərinə görə, qardaşı pul əskinasları üçün nəzərdə tutulmuş rezinlərə hər ay 2500 dollar xərcləyirdi. Fondda saxlanılan pulların 10%-i isə sıçovullar tərəfindən məhv edilirdi.

Deyilənə görə, dəfələrlə Eskobar özü qaçaq kokainlə dolu təyyarəni özü idarə edib. Bir müddət sonra isə o, 15 yeni təyyarə və 6 helikopter almışdı. Bir uğurlu reysin nəticəsində Eskobarın pilotları 500 min funt sterlinq qazanırdı.

23 ton narkotik daşıtdırdı

Digər maraqlı faktlardan biri də ABŞ-a göndərilən ən iri narkotik partiyasının 23 ton olmasıdır. Roberto danışır ki, Pablonun məsafədən idarə olunan iki sualtı gəmisi var idi və onlar da bu işə xidmət edirdi.

Eskobar 1980-cı illərin əvvələrində özünün böyük narkotik imperiyasını yaratmışdı. O, ABŞ, Pakistan, Meksika, Puerto-Riko və Tayland kimi ölkələrə narkotik satışı ilə məşğul olurdu.

Parlamentə gedən yol

1982-ci ildə öz biznesini daha təhlükəsiz formada idarə etmək və irəliləmək məqsədi ilə Eskobar Kolumbiya parlamentinə millət vəkili seçilmək istədi. Bu dəfə də uğur onun üzünə güldü. Eskobarın vəkil olaraq seçilməsi yerli mətbuat orqanlarında qanunun "narkobaron" tərəfindən satın alınması kimi təqdim olunmuşdu. Buna baxmayaraq, Eskobar öz biznesini durmadan genişləndirməyə davam edirdi.

Eskobarın rəhbəri olduğu Medellin karteli 200-ə yaxın müstəntiq və 1000 yaxın polisin öldürülməsində ittiham olunduğu üçün 1989-cu ildə bir jurnalist Eskobarın həbs edilməsi üçün sübutlar üzə çıxarmışdı. O, əlində olan dəlilləri polisə gətirmək ücün təyyarəyə minən zaman Eskobarın yaxın adamları tərəfindən təyyarə havada partladılmışdı. Partlayış nəticəsində jurnalistlə birlikdə daha 110 nəfər dünyasını dəyişmişdi.

Bu hadisə ölkədə və regionda geniş qalmaqalın yaranmasına səbəb olmuşdu. Buna görə 1990-cı ildən etibarən təqib olunan Pablo Eskobar Kolumbiyanın bütün xarici borcunu ödəməyə hazır olduğunu bəyan etmişdi. İki il sonra isə onun haqqında axtarış verilmişdi. Onun həbs olunmasını ən çox yerli polislər istədiyi üçün o, hər bir polis əməkdaşının öldürülməsinə görə 3 min dollar vəd etmişdi. Onun polislərə olan hədsiz nifrət hissi hər kəsə bəlli idi.

Bu çağırışa görə müxtəlif vaxtlarda 400-dən çox polis qətlə yetirilmişdi.

Tənəzzül

1993-cü ildə Medellin polisi gizlənən Eskobar haqqında ətraflı məlumata sahib idi. "Narkobaron"un yerinin müəyyən edilməsinə yönəlmiş əməliyyat prosesi düz 6 ay müddətində çəkmişdi. Onun ələ keçməsində dolayısı ilə günahkar elə öz oğlu omuşdu.

Saatlarla oğlu Xuan Pablo ilə telefonla danışan Eskobarın olduğu ərazi polis tərəfindən müəyyən edilmişdi. Bunu anlayan Eskobar gizləndiyi evin damına çıxmış, polis əməkdaşlarının çardağa atəş açması nəticəsində ağır yaralandıqdan sonra hündürlükdən yıxılaraq dünyasını dəyişmişdi.

Uzun və macəralı həyat yoluna 1993-cü ildə son qoyulan Eskobarla bağlı bir çox izaholunmaz faktlar var. Onlardan biri isə narkotik ticarətindən milyard dollarlar qazanan Pablo Eskobarın heç vaxt narkotikdən və siqaretdən belə istifadə etməməsidir.

Uşaqlarının israfçılığa yol verərək çoxlu pul xərləməsinə və siqaret çəkməsinə qarşı olan baron doğma Medellində xəstəxana, kilsə, məktəb və uşaq evlərinin tikilməsi üçün milyonlarla dollar pul ayırmışdı. Məhz bu xüsusiyyətlərinə görə yerli medellinlilər onu müsbət və xeyirxah şəxs kimi xarakterizə edir və ehtiramla yad edirlər.