Yunanıstan geri addim atdı, yeni kreditlər alır

Maliyyə girdabina qərq olan Yunanıstanın aqibətilə bağlı Brüsseldə avrozona maliyyə nazirlərinin toplantısında hər hansı razılaşma əldə olunmayıb. Yeni maliyyə tranşının ayrılıb-ayrılmayacağı ətrafında müzakirələr davam etdiriləcək. Bundan başqa avrozonadan kənarlaşmaq təhlükəsilə üzləşən Yunanıstanda solçu hökümətin sonda maliyyə islahatları ilə bağlı planı qəbul etməsi, ölkədə yaşayan təqaüdçülərin çoxunu məyus edib. Yunanıstan hökuməti bankların iyulun 13-nə qədər bağlı qalacağını bəyan edib.

Əlavə dəyər vergisinin artırılması, bir sıra dövlət xərclərinin, həmçinin təqaüdlərin ixtisarını nəzərdə tutan sənəd Yunan parlamentində nəhayət ki, qəbul olunub.

Rəsmi Afinanın uzun müddət qəbul etmək istəmədiyi, amma Avropa liderlərinin israrlı şəkildə tələb etdiyi qanun layihəsinin leyhinə 251 deputat səs verib, yalnız 32 millət vəkili bu qanun layihəsilə razılaşmayıb. Yeni qanunun parlamentdə qəbulu əhalinin narahatlığına səbəb olub.

“Pensiyanı daha bundan artıq ixtisar edə bilməzlər. Mən yaşa görə aldığım təqaüdlə nəvəmi saxlayıram. Baş nazir onu da ixtisar etsə, nəvəmə yeməyə ərzaq ala bilməyəcəyəm. Tsipraz bütün bunları çox yaxşı başa düşür”, – deyə 72 yaşlı təqaüdçü Vasilis Dakadakis bildirib.

Baş verənlər fonunda kapitala olan dövlət nəzarəti ölkədə alış-verişin kəskin şəkildə zəifləməsinə təsir edib. Afinada fəaliyyət göstərən kiçik sahibkarlar əmin edir ki, gəlirlərinin 70 faizini itirirlər. Yerli sakinlərsə, zəruri olmayan əşyalara və yerlərə pul sərf etmir.

Bəzi ticarət obyektləri hələ də kredit kartlarla xidmət göstərsə də, yunanlar maksimum qənaətcil olub. Əhali bankomatlar qarşısında növbələrə duraraq, hər günə icazə verilən məbləğ həddində nağd pul çıxarırlar. Bu isə bankları iflasa aparır.

Bu arada Avroqrup yeni islahatlar paketi qəbul edən rəsmi Afinanın dövlət borcu probleminin həlli üçün təqdim etdiyi yeni təklifləri nəzərdən keçirir. Danışıqlar çox çətin və gərgin şəraitdə aparılır. 

Avrozona nazirləri göstəriləcək güzəştlərin müqabilində rəsmi Afinadan əmək bazarında və digər sahələrdə sərt islahatlara dair verilən vədləri həqiqətən yerinə yetiriləcəyi üçün spesifik zəmanətlər istəyir.

Üçüncü maliyyə yardımının məbləği ətrafında ciddi ixtilaflar olsa da, bütün rəsmilər bir nüansla razılaşır. Gündəmə çıxarılan məsələ təkcə Yunanıstanın gələcəyini yox, eyni zamanda vahid valyuta zonasının aqibətini müəyyən edəcək. (ans tv)

Ölkə.Az