Çin ABŞ-dan kömək istədi

Çin hökuməti ABŞ-a müraciət edərək "Şərqi Türküstan" radikalları ilə mübarizədə Vaşinqtondan yardım istəyib.

Ölkə.az Çinin rəsmi informasiya agentliklərinə istinadən xəbər verir ki, ABŞ və Çin xarici siyasət nümayəndələri arasında keçirilən məsləhətləşmələrdə Pekin rəsmiləri ABŞ-dan kömək istəyiblər.

Məlumat verilir ki, Çinin xarici işlər nazirinin müavini Çen Qopin və ABŞ Dövlət Departamentinin terrorçuluqla mübarizə şöbəsinin koordinatoru Tina Kaydanov dünən Pekində verdikləri birgə mətbuat konfransında "Şərqi Türküstan" məsələsinə toxunublar.

""Çin tərəfi "Şərqi Türküstan İslam Hərəkatı"nın ciddi təhdidləri haqda ABŞ rəhbərliyini və dünya ictimaiyyətini məlumatlandırıb. Biz ABŞ hökumətinə müraciət edərək onlardan bu hərəkatla mübarizədə kömək istəmişik"", deyə Çen Qopin bildirib.

"Hər iki tərəf hesab edir ki, terror təhlükəsi artmaqdadır və onunla mübarizə getdikcə çətinləşir. Bu məsələdə ABŞ və Çin ikitərəfli əlaqələri genişləndirmək və birgə səyləri artırmaq üçün razılıq əldə ediblər. Bu, bütün dünyada təhlükəsizliyin təmini üçün çox vacib şərtdir", deyə Dövlət Departamentinin koordinatoru əlavə edib.

Xatırladırıq ki, "Şərqi Türküstan İslam Hərəkatı" Çinin Uyğur Muxtar Vilayətində apardığı siysətə qarşı çıxaraq dəfələrlə ölkənin müxtəlif bölgələrində terror aktları törətmişdi.

Ölkə.az