Qaribaşvili: \"Gürcüstan Rusiyaya qarşı sanksiyalara qoşulmamalıdır\"

"Gürcüstan Avropa İttifaqının Rusiyaya qarşı sanksiyalarına qoşulmaq niyyətində deyil"

Ölkə.Az xəbər verir ki, bu barədə Gürcüstanın baş naziri İrakliy Qaribaşvili jurnalistlərə müsahibəsində bəyan edib.

"Hökumət başçısı kimi hesab etmişəm və edirəm ki, Gürcüstan Avropa İttifaqı tərəfindən Rusiya Federasiyasına qarşı tətbiq olunmuş sanksiyalara qoşulmamalıdır. Biz keçən il də bu mövqedə olmuşuq, indi də bu mövqedəyik və onu dəyişmək fikrimiz yoxdur. 23 iyun 2014-cü ildə biz Aİ tərəfindən müəyyən edilmiş 15 sanksiyadan yalnız birinə qoşulmuşduq", - deyə baş nazir bildirib.

Qaribaşvili qeyd edib ki, Gürcüstan üçün son illər Rusiya ilə qurulmuş ticari-iqtisadi münasibətlərə dəyər verir və bu, iki ölkə arasında konstruktiv dialoqun nəticəsidir.

Xatırladaq ki, bir neçə gün öncə Gürcüstan xarici işlər naziri David Dondua ölkəsinin Avropa İttifaqının Rusiyaya qarşı yönəlmiş sanksiyalara qoşulması barədə danışıb. O bildirib ki, Gürcüstan Krım və Sevastopolda istehsal olunan məhsulların ixracına qadağanın qoyulması ilə bağlı sanksiyalara qoşulmağa məcbur olub.

Rəşid Mustafazadə

Ölkə.Az