Obamadan İsrailə və yəhudi diasporuna sərt xəbərdarlıq

ABŞ-İsrail münasibətlərində gözlənilməz gərginlik yaranıb.

Ölkə.az xəbər verir ki, onilliklərdir yaxın müttəfiq olan İsrail və ABŞ-ın münasibətləri qopma həddinə çatıb.

İranla ABŞ başda olmaqla "altılıq" ölkələri arasında əldə olunmuş ilkin razılıqdan sonra İsrail bu müqavilənin əleyhinə geniş kampaniyaya başlayıb.

İranın nüvə proqramını dayandırmaq qarşılığında ona tətbiq olunan beynəlxalq embarqonun ləğvi haqqındakı razılaşma ABŞ-da yəhudi diasporu tərəfindən də hiddətlə qarşılanıb. Amerikanən ən böyük yəhudi təşkilatlarından olan Amerika-İsrail İctimai Əlaqələr Komitəsi İranla əldə olunmuş sazişin Konqresdən keçməməsi üçün geniş kampaniyaya başlayıb.

Məsələyə müdaxilə edən ABŞ prezidenti Barak Obama İsrailə və yəhudi təşkilatlarına sərt xəbərdarlıq edib. ABŞ mediasına rəsmi qaynaqlardan sızan məlumatlara görə, keçən həftə Barak Obama ölkənin ən nüfuzlu yəhudi diasporu başçılarını Ağ Evə çağıraraq İran məsələsində onlara ciddi xəbərdarlıq edib. Görüşün gizli gerçəkləşdirildiyi bildirilir.

Yəhudi liderləri ilə görüşdən bir gün sonra isə Amerika Universitetində çıxış edən Obama İranla müqavilənin əleyhinə çıxanları ABŞ-ı Yaxın Şərqdə daha bir müharibəyə çəkmək cəhdlərində ittiham edib.

"ABŞ-ı milyardlarla dollar ziyana salan İraq müharibəsinə sürükləyən lobbiçilər" ifadəsi ilə Obama yəhudi diasporuna eyham vuraraq İranla əldən olunan razılaşmanın böyük nailiyyət olduğunu və dünyada sülhün möhkəmlənməsi üçün bu sazişin çox vacib olduğunu vurğulayıb.

Analitiklər yəhudi diasporunun Obamanın bu sözlərini cavabsız qoymayacağını və ölkədə yeni qalmaqalların baş qaldıracağını proqnozlaşdırırlar.

Ölkə.az