İran hökumətində dərin çatlar: casus xəbərinin ardınca, molla rejiminin dayağı istefaya gedir

İran Ali Milli Təhlükəsizlik Şurasının katibi olan Əli Şəmxaninin keçmiş müşaviri, Strateji Araşdırmalar İnstitutunun rəhbəri Əlireza Əkbərinin Britaniya kəşfiyyatının (SIS) casusu kimi edam cəzası, onsuz da son aylarda bu ölkədə hökm sürən böhranlı və təlatümlü vəziyyəti daha da mürəkkəbləşdirib. “Casus” əməliyyatı İranın siyasi elitasında və hakimiyyət daxilində  ciddi parçalanmalara, mühafizəkarlarla  islahatçılar arasında  növbəti “müharibəyə” yol açıb. Hakimiyyətdaxili qruplar arasında amansız mübarizə başlanıb. 

Artıq “super casus” qalmaqalının ilk qurbanı İranın Ali Milli Təhlükəsizlik Şurasının katibi, admiral Əli Şamxaninin “başını yeməkdədir”. İran mediası Əli Şamxaninin istefaya göndərilməsi barədə məlumatlar yaymaqdadır. 

Lakin İranın Ali Milli Təhlükəsizlik Şurasından “Nour News”ə verilən məlumata görə, Əli Şamxaninin Ali Milli Təhlükəsizlik Şurasının katibi postunda səlahiyyət müddətinin başa çatması və istefaya getməsi barədə məlumat təkzib edilib. 

“Ali Milli Təhlükəsizlik Şurasının katibliyinin rəhbərliyində hər hansı dəyişikliklə bağlı qərar qəbul edilməyib”, – Şuradan bildirilib.

Bu açıqlama bir sıra qeyri-rəsmi xəbər orqanlarının Şamxaninin tezliklə dəyişdiriləcəyini iddia etməsindən və onun varisi kimi bir sıra adların çəkilməsindən sonra verilib. Amma bir deyim var, “od olmayan yerdən tüstü çıxmaz”.  Özü də İran kimi qapalı, teokratik bir dövlət idarəetmə sisteminə malik bir ölkədə.

Bu, istənilən halda İranın mərkəzi hakimiyyətində ciddi parçalanmaların, hakimiyyətdaxili qruplar arasında açıq savaşın olduğundan və mərkəzdənqaçma meyillərindən xəbər verir. Baş verən hadisələr eyni zamanda İranda böhranlı vəziyyətin hələ uzun müddət davam edəcəyini göstərir. Bunun hansı nəticələrlə yekunlaşacağını isə zaman göstərəcək.

Mürtəza
Ölkə.Az