Bir saata okeanın o tayında olacaqsınız

Londondan Nyu-Yorka transatlantik uçuş vaxtı cəmi bir saat ola bilər.

Söhbət “Airbus” təyyarəqayırma şirkəti tərəfindən ABŞ-da təzəcə patentləşdirilmiş səsdən sürətli futurist təyyarədən gedir. Məlum olduğu kimi, hazırda bu uçuşa 7-8 saat vaxt sərf edilir. Belə təyyarədə üç saata Parisdən San-Fransiskoya çatmaq mümkün olacaq. Bu, indiki müddətlə müqayisədə təxminən dörd dəfə azdır. Avialayner səsin sürətindən 4,5 dəfə artıq sürətlə uça biləcək.

Patent sifarişində göstərilib ki, hava gəmisinin əsasını üç müxtəlif tipli mühərriklər sistemi təşkil edir. Füzelyajın qabaq hissəsində yerləşdiriləcək turboventilyatorlu reaktiv mühərriklər təyyarənin raket kimi şaquli vəziyyətdə yerdən qalxması üçün nəzərdə tutulur. Təyyarənin sürəti səs sürətinə çatanda həmin mühərriklər söndürüləcək və şassi kimi qatlanaraq füzelyaja yığılacaq. Bundan sonra təyyarənin quyruq hissəsindəki raket mühərriki işə düşərək, laynerin 30,5 kilometr yüksəkliyə qalxmasını təmin edəcək. Layner lazımi yüksəkliyə çatanda raket mühərrikinin əvəzinə təyyarənin qanadları altında yerləşən səsdən sürətli iki reaktiv mühərrik işə düşəcək.

Səsdən sürətli təyyarə düzəldilməsi həm baha başa gələn, həm də riskli işdir. Səsdən sürətli aviasiyanın qızğın inkişaf etdiyi 1960-cı illərdə Britaniya və Fransa mütəxəssislərinin birlikdə yaratdığı əfsanəvi “Concorde” sərnişin təyyarəsi ilə bağlı bir fakt buna əyani sübutdur. “Concorde” sərnişin təyyarələrindən biri 2000-ci il iyulun 25-də Parisdəki “Şarl de Qoll” aeroportundan havaya qalxarkən qəzaya uğrayıb. Təyyarədəki 109 nəfərin hamısı həlak olub. 2003-cü ildə səsdən sürətli “Concorde” təyyarələrinin istismardan çıxarılmasının əsas səbəblərindən biri bu faciə olub.AzərTaC

Ölkə.Az