İran hərbçiləri Yəməndə əsir düşdü

İran hərbçilərinin sayı məlum deyil

Ölkə.Az xəbər verir ki, Yəməndə "Ənsar Allah" hərəkatının tərəfində vuruşan İran ordusunun hərbi qulluqçuları hökumət yönümlü qeyri-nizami qoşun dəstələri tərəfindən əsir götürülüb.

Məlumat Yəmənin xarici işlər naziri Riyad Yasinin bəyanatında yer alıb.

Riyad Yasin bildirib ki, husi üsyançıları və sabiq prezident Əli Abdulla Saleh tərəfində döyüşən İslam inqilabı keşikçiləri korpusunun üzvləri ələ keçirilib. Nazir saxlanılan İran hərbçilərinin sayı və saxlandığı yer haqqında dəqiq məlumat verməyib.

Səudiyyə Ərəbistanı martın 25-də husilərin Yəməndə ölkənin cənub əyalətlərinə irəliləməsinin qarşısını almaq və BMT-nin rəsmi olaraq tanıdığı prezident Əbd Rəbbi Mənsur Hadinin yenidən hakimiyyətə gətirilməsi məqsədilə Yəmənə qarşı hava hücumlarına başlayıb. 10 ərəb dövləti və ABŞ "Qətiyyət fırtınası" adlanan bu hərbi əməliyyatı dəstəkləyib.

Husilər ötən ilin sentyabrından Yəmənin paytaxta hücum edib, Mənsur Hadi hakimiyyətini devirərək paytaxt Sənanı nəzarətə götürüb. O, ötən ay ölkənin cənubundakı Ədən şəhərinə sığınıb. Üsyançılar cənub regionlarına irəlilədiyinə görə onun artıq ölkədən çıxdığı deyilir. Mənsur Hadi BMT Təhlükəsizlik Şurası və Ərəb Dövlətləri Liqasından husiləri dayandırmaq üçün hərbi yardım istəmişdi.

Rəşid Mustafazadə

Ölkə.Az