Senssasiya: Yeltsinlə Buş Ukrayna ilə bağlı məxfi stenoqramı açıqlanıb - FOTO

Rusiyanın ilk Prezidenti Boris Yeltsin (1991-1999-cu il) 1992-ci ildə ABŞ-nin ovaxtkı Prezidenti Corc Buşla (1989-1993) Kemp Deviddə geniş tərkibdə görüşündə Ukraynanı “əsas sabitliyi pozan amil” adlandırıb.

“Ölkə.Az” xəbər verir ki, bu, ABŞ-nin Corc Vaşinqton Universitetində Milli Təhlükəsizlik Arxivi ictimai araşdırma təşkilatı tərəfindən bazar ertəsi yayımlanan söhbətin məxfiləşdirilməmiş stenoqramında deyilir.

Həmin görüşdə Yeltsin 1991-1994-cü illərdə Ukrayna Prezidenti olmuş Leonid Kravçukla “yaxşı şəxsi münasibətləri” olduğunu qeyd edib. Yeltsin eyni zamanda Ukrayna Ali Radasında millətçi deputatların olmasına işarə edərək deyib ki, Radada bir qrup var: “Bunlar ifrat millətçilərdir, onlara (Ukraynanın) xalq ruhları deyirlər. Onlar təsirə malik olsalar da, amma parlamentdə çoxluqda deyildirlər. Ruh ona (Kravçuka) ciddi təzyiq göstərir. Mən bu məsələdə Kravçukun mövqeyini yüksək qiymətləndirirəm”, - o deyib. 

Yeltsin onu da bildirib ki, Ukraynada 11 milyon etnik rus var: “Onlar Ukraynanın şərqində, Rusiya ilə sərhəddə yaşayırlar, Krımda da ruslar çoxluq təşkil edir. Onlar Rusiyaya qoşulmağa səs verə bilərdilər. Bu faktla bağlı Ukraynanın hansısa ciddi dönüşlər edəcəyini düşünmürəm. Qeyd edək ki, bizim əsas sabitliyi pozan amil Ukraynadır”.

Milli Təhlükəsizlik Arxivi həmin vaxta aid daha bir neçə sənəd dərc edib. Onların arasında prezidentlərin növbəti görüşünün stenoqramı, Yeltsinin Buşa 27 yanvar 1992-ci il tarixli məktubu və 1992-ci ilin aprelində Buşun Yeqor Qaydarla söhbətinin stenoqramı var. O zaman Qaydar xüsusən də Moskva ilə Kiyev arasındakı bütün problemləri həll etmək üçün “çox vaxt” lazım olacağını, lakin Rusiya ilə Ukrayna arasında “Yuqoslaviya ssenarisi”nin olmayacağını söyləyib.

Milli Təhlükəsizlik Arxivi bütün sənədləri araşdıraraq qeyd edir ki, ümumilikdə ABŞ və Rusiya rəhbərliyinin nümayəndələri arasında demək olar ki, bütün söhbətlərdə Ukrayna ilə münasibətlər mövzusuna toxunulub. 

Bundan əlavə, Yeltsin Buşla görüşlərinin birində Moskvanın keçmiş sovet respublikaları ilə münasibətlər kontekstində imperiya ambisiyalarının olmamasına işarə edib.

Mürtəza
Ölkə.Az