Pakistanda məscidin partladılmasında ölənlərin sayı 90-a çatıb

Bir günlük matəm elan edilib.

“Ölkə.Az” xəbər verir ki, bazar ertəsi Peşəvərdə (Əfqanıstanla sərhədin yaxınlığında, şimal-qərbdə yerləşən Hayber-Paxtunxva əyaləti) məsciddə baş verən partlayış nəticəsində ölənlərin sayı 90-a çatıb.

Yerli hüquq-mühafizə orqanlarının məlumatına görə, partlayışdan az sonra 200-dən çox zərərçəkən xəstəxanaya çatdırılıb, onlardan 100-ə yaxınının müalicəsi davam edir, qalanları isə evə buraxılıb.

Hayber-Paxtunxva əyalətinin başçısı Məhəmməd Əzəm Xan bütün bölgədə bir günlük matəm elan edib.

Bundan əvvəl Geo.tv kanalı məsciddə baş verən partlayışda 72 nəfərin öldüyünü bildirib.

Milli təhlükəsizlik rəsmilərinin məlumatına görə, polis və hərbçilər də daxil olmaqla insanların sıx olduğu məsciddə günorta namazı zamanı kamikadze partlayıcı qurğunu işə salıb. Hadisə yerində xilasetmə əməliyyatı davam edir və qurbanların sayı arta bilər. Qeyd olunur ki, partlayış zamanı məsciddə 500-ə qədər adamın olduğu bildirilir.

Mürtəza
Ölkə.Az