FBİ-ın axtardığı yeganə qadın: 4 milyardla qaçan “kraliça” belə ifşa oldu

Federal Təhqiqatlar Bürosunun (FTB/FBI) axtarılanlar siyahısındakı yeganə qadın Ruja İqnatova 6 il sonra yenidən gündəmə gəlib. 

Ölkə.Az “Business Insider” qəzetinə istinadla xəbər verir ki,  İngiltərənin paytaxtı Londonda satışa çıxarılan mənzil Bolqarıstan əsilli  R.İqnatovanın sağ olduğunu üzə çıxarıb.

42 yaşlı İqnatovanın şirkət vasitəsilə aldığı mənzil ölkədəki qanun dəyişikliyi səbəbindən sahibinin kimliyi ilə dərc edilib.

İqnatova hazırda dünyanın ən məşhur cinayətkarlarından biri kimi axtarışdadır.

Dəyəri 11 milyon funt-sterlinq (təxminən 23 milyon manatdan çox-red.) olan mənzilin satılıb-satılmadığı isə hələlik məlum deyil.

Xatırladaq ki, Ruja İqnatova qurduğu “OneCoin” şirkəti ilə dünyanın hər yerindən olan insanlardan 4 milyard dollardan çox pul toplayaraq 2017-ci ildə yoxa çıxmışdı. 

Qeyd edək ki, İqnatova hazırda FTB-nin “Ən çox axtarılan 10 qaçaq” siyahısına daxildir.

Günay