Daha bir ölkə narkotikdən bu halda istifadəyə icazə verildi

Kanadanın Britaniya Kolumbiyası əyalətində 31 yanvardan etibarən narkotik maddənin daşınmasının cinayət sayılmayacağı açıqlanıb.

Ölkə.Az xarici KİV-ə istinadla xəbər verir ki, bu barədə Britaniya Kolumbiyası əyalətinin Psixi Sağlamlıq və Dövlət Narkomaniya İdarəsi məlumat verib.

Belə ki, yeni qərara əsasən, 2,5 qrama qədər narkotik maddənin istifadəsi cinayət sayılmayacaq.

Bildirilib ki, bu istisna kokain, heroin və morfin kimi narkotikləri əhatə edir.

Yeni qərarın 3 il müddətinə qüvvədə olacağı qeyd edilib.

Psixi Sağlamlıq və Narkomaniya üzrə Dövlət Katibi Cennifer Vaytsayd deyib ki, narkotik istifadəçilərinin cinayətdən azad edilməsi, maddə istifadəsi ilə bağlı qorxu və utanc hissini aradan qaldırır:

“Bu, daha çox insanın xidmətlərə və dəstəyə çatması üçün mühüm addımdır”,-o əlavə edib.

Qeyd edək ki, narkotiklər qanunsuz olmağa davam edəcək. Lakin, ümumi çəkisi 2,5 qramdan az olaraq istifadə edən 17 yaşdan böyüklər saxlanılmayacaq.

Xatırladaq ki, Uruqvay, ABŞ (25 ştatında) və Kanadada marixuananın istifadəsi, satışı, alışı və saxlanılmasına icazə verilən ölkələrdir. Hollandiyada marixuana qismən leqallaşdırılıb. Marixuananın tibbi istifadəsi isə Xorvatiya, İsrail, Polşa və Yunanıstanda mümkündür.

Günay