İran-Azərbaycan qarşıdurması Ermənistana nə vəd edir? - İrəvan narahatdır

İranı özünə qardaş ölkə hesab edən Ermənistan İran və Azərbaycan arasında baş verən hadisələrdən narahat olmağa başlayıb.

Ölkə.az Bizimyol.info-ya istinadən xəbər verir ki, iranşünas Anna Gevorqyan İranla Azərbaycan arasında toqquşma olacağı təqdirdə Ermənistan üçün riskləri təqdim edib və bunun ermənilər üçün faydalı olub-olmaması sualını cavablandırıb.

"Hesab edirəm ki, yox. Heç bir münaqişənin birmənalı nəticəsi ola bilməz. Regionda hər hansı münaqişə birmənalı olaraq bizim maraqlarımıza uyğun ola bilməz. Təsəvvür edək ki, İranla Azərbaycan arasında münasibətlər o qədər kəskinləşib ki, onlar hərbi eskalasiyaya çatıb”,- iranşünas Anna Gevorqyan bildirib.

Bundan əlavə, Gevorqyan PTA-nın efirində “Artıq İrandan keçməyəcək Naxçıvanla Ermənistan ərazisi ilə quru əlaqəsi məsələsi Azərbaycan üçün aktuallaşacaq, yoxsa yox?” – deyə sual verib.

Onun sözlərinə görə, bu məsələ Qərb tərəfdaşları ilə münasibətlərdə mübahisə predmetinə çevriləcək.

“Həmçinin regionda yeni müharibə yeni qaçqınların meydana çıxması deməkdir. Beləliklə, Ermənistan Azərbaycanın İrana qarşı istifadə etməyə çalışdığı İranın şimal, azərbaycandilli əyalətlərindən olan qaçqınları qəbul etmək problemi ilə üzləşəcək.

Ekspertlər istənilən hərbi münaqişəni 10 müxtəlif versiyada təhlil edirlər”,- deyə o, bildirib və illüziyalara uymamağa çağırış edib.

Azərbaycanın İrandakı səfirliyində fövqəladə vəziyyətin tətbiqindən və İsfahandakı obyektə pilotsuz təyyarələrin hücumundan sonra İranla Azərbaycan arasında münasibətlərin kəskinləşməsinə gəlincə, ekspert bunu iki ölkə arasında gedən hibrid müharibə fonunda nəzərdən keçirməyə çağırıb.