Rusiya Zatulinin dili ilə günahı üzərindən atır - növbəti sərsəmləmələri

Rusiya bölgədə sülhə nail olmaq əvəzinə destruktiv fəaliyyətini digərlərinin üzərinə atmaqla “sudan duru” çıxartmağa çalışır.

Hər zaman anti-Azərbaycan mövqeyi ilə seçilən Rusiya Dövlət Dumasının MDB işləri üzrə komitə sədrinin birinci müavini Konstantin Zatulin Teleqram kanalındakı sonuncu “Rusiyanın Laçın dəhlizindəki aksiyanı dağıtmaq istəməməsinin səbəbi”ni şərh etməsi də, bu silsilədən olan mövqedir.  

O, “Rusiya Laçın dəhlizindəki aksiyanı dağıtmaq üçün güc tətbiq etmir, çünki belə bir əmr vermək asandır və bunun nəticəsi heç də yaxşı olmayacaq” qeyd edib.

Zatulin bildirib ki, Rusiya üçtərəfli bəyanatın razılaşmalarına əsasən məsələyə nail olmaq və Rusiya sülhməramlılarının vəziyyətə nəzarət etmək səlahiyyətlərini təsdiqləmək istəyir.  O, əlavə edib ki, bu səbəbdən ehtiyatlı davranır, lakin Azərbaycan buna mane olur.

“Aydındır ki, Azərbaycan başqa bir şey axtarır - bu nəzarəti öz üzərinə götürmək istəyir. Bu yolla o, məqsəd və istəklərinin həyata keçirilməsində daha da irəliləmək istəyir. Onun niyyəti tamamilə göz qabağındadır”, - deyə Zatulin vurğulayıb. 

Nədənsə Zatulin unudur ki, 10 noyabr 2020-ci il üçtərəfli bəyanatın  tələblərinə əsasən rus hərbi kontingenti Ermənistanla Azərbaycan arasında sülh sazişinin ən qısa zamanda imzlanması üçün Qarabağdakı terroristləri, separatçıları və  qanunsuz hərbi birləşmələri tərksilah edib, Azərbaycan ərazilərindən çıxarmalı idi. Lakin Rusiya ötən müddət ərzində  sülhə nail olmaq əvəzinə bölgədə gərginliyin davam etməsi üçün  separatçılar və terrorçularla əlbir olub, onlara hər cür dəstək verib. Məhz rus hərbçilərinin  separatçılara dəstəyi nəticəsində bölgədə sülh sazişi istiqamətində ciddi irəliləyişə nail olunmayıb.

Digər tərəfdən isə ən  müxtəlif bəhanələrlə  bölgədə yaratdığı gərginliyi və sülhə maneçilik  hərəkətlərini başqalarının üzərinə yıxmağa çalışıb. Erməni sevdalısı Zatulinin son açıqlaması da rusların bölgədə gərginliyə xidmət edən fəaliyyətlərini başqasının üzərinə atmaq məqsədinə xidmət edir.

Rusiya Zatulin kimilərin əli ilə bölgədki destruktiv fəaliyyətinə bəraət qazandırmaqdansa, üzərinə düşən öhdəlik və missiyanı yerinə yetirib, tezliklə sülhə nail olmaq istiqamətində real addımlar atsa, daha yaxşı olar… 

Mürtəza
Ölkə.Az