ABŞ SEPAH qüvvələrinə hava zərbəsi endirib

ABŞ Suriyanın şərqindəki hədəflərə hava zərbəsi endirib.

“Ölkə.Az” xəbər verir ki,  bu barədə Pentaqonun mətbuat xidməti məlumat yayıb.

Məlumatda deyilir ki, ABŞ ordusu cümə axşamı Suriyadakı hədəflərə bir sıra hava zərbələri endirib.

“Prezident Baydenin göstərişi ilə mən ABŞ Mərkəzi Komandanlıq qüvvələrinə bu gecə Suriyanın şərqində İran SEPAH-ı ilə əlaqəli qrupların istifadə etdiyi obyektlərə dəqiq hava zərbələri endirmək icazəsi verdim”, - müdafiə naziri Lloyd Ostin bildirib.

O əlavə edib ki, hava zərbələri bugünkü hücuma, eləcə də SEPAH ilə əlaqəli qruplar tərəfindən Suriyadakı beynəlxalq koalisiya qüvvələrinə qarşı son hücumlara cavab olaraq  endirilib.

“Prezident Baydenin açıqladığı kimi, biz xalqımızı qorumaq üçün bütün lazımi tədbirləri görəcəyik və seçdiyimiz vaxtda və yerdə həmişə qisas alacağıq. Heç bir qrupun bizim qoşunlarımıza qarşı  hücumları cavabsız və cəzasız qalmayacaq” - amerikalı nazir deyib.

Pentaqonun yaydığı məlumatda deyilir ki, martın 23-də ABŞ-nin rəhbərlik etdiyi beynəlxalq antiterror koalisiyasının Suriyanın şimal-şərqindəki bazasına pilotsuz uçuş aparatının hücumu nəticəsində bir amerikalı hərbçi ölüb, beşi isə  yaralanıb.

Mürtəza
Ölkə.Az