İran Londonda iki bank açır

Mərkəzi Bankın başçısı deyib

Ölkə.Az xəbər verir ki, yaxın gələcəkdə İran Londonda iki yeni bank açacaq.

Bunu İran Mərkəzi Bankının başçısı Vəliyullah Seif Böyük Britaniyanın xarici işlər naziri Filip Hammondla görüş çərçivəsində deyib.

Onun sözlərinə görə, Londonda "Bank Melli Iran" və "Persian International Bank"ın şöbələri fəaliyyətə başlayacaq. Görüşdə tərəflər əməkdaşlığın genişləndirilməsi imkanlarını müzakirə ediblər.

Xatırladaq ki, iyul ayında Vyanada İran ilə altılıq ölkələri arasında aparılan danışıqlarda ötən gün razılaşma əldə olunub. Bu razılaşmaya görə, İran daxilində nüvə obyektlərinin təftişi - BMT inspektorlarına hərbi obyektləri təftiş etməyə icazə verilə bilər, amma bu avtomatik olmaya bilər.

İran razılaşır ki, əgər razılaşmanı pozarsa, sanksiyalar 65 gün ərzində bərpa oluna bilər. bundan başqa, BMT-nin silah embarqosu və raket sanksiyaları 5-8 il ərzində qüvvəsində qalacaq.

İran ilə altılıq ölkələri arasında əldə olunan bu razılaşma dünyada birmənalı qarşılanmayıb. Bir çox ölkə İranla "altılıq" arasında əldə olunan razılığı dəstəkləsə də, digərləri tənqid edir.

Rəşid Mustafazadə

Ölkə.Az