Ermənistanda və Yaponiyada zəlzələ olub

Ermənistanda Spitakdan 4 km şimal-şərqdə zəlzələ olub.

Bu barədə Ermənistan Daxili İşlər Nazirliyinin mətbuat xidməti məlumat yayıb.

Nazirlik xəbər verir ki, maqnitudası 3,0, ocağının 10 km dərinliyi olan yeraltı təkanlar yerli vaxtla saat 18:54-də qeydə alınıb.

Episentrdə güc 4 bal olub.

Zəlzələ Lori rayonunun Spitak, Stepanavan və Vanadzor, həmçinin Şirakamut, Arjut, Lernapat və Şahumyan kəndlərində 3-4 bal gücündə hiss olunub.

Bundan əlavə, Yaponiyanın şimal-şərqində də 5,2 bal maqnitudada zəlzələ baş verib.

Bu barədə Yaponiya Milli Meteorologiya İdarəsi məlumat yayıb.

Yeraltı təkanların episentri Miyaqi prefekturasında, ocağı isə 60 km dərinlikdə yerləşib.

Tələfat və dağıntılar barədə məlumat verilməyib, sunami təhlükəsi elan edilməyib.