Ukraynalı nazir müavini: Ruslar Baxmutda kiçik də olsa uğur qazanır

Rus ordusu Baxmut uğrunda döyüşdə cüzi uğurlar qazansalar da, şəhəri tuta bilmirlər.

“Ölkə.Az” xəbər verir ki, bu barədə Ukrayna müdafiə nazirinin müavini Anna Malyar teleqram kanalında məlumat verib .

Malyar qeyd edib ki, cəbhə xəttində əməliyyat şəraiti kifayət qədər mürəkkəb olaraq qalır:

“Təcavüzkar eyni vaxtda dörd istiqamətdən - Limanski, Baxmut, Marinka və Avdeyevkadan hücum əməliyyatlarını həyata keçirir. Əsasən uğurlu alınmır”.

Nazir müavini əlavə edib ki, ruslar ən böyük diqqəti Baxmut istiqamətindədir: "Ən böyük səylər Baxmut üzərində nəzarətin qurulmasına yönəlib, şəhərin mərkəzi hissəsinə doğru irəliləməyə çalışır, bəzi ərazilərdə cüzi dəyişkən uğurlar qazanır. Lakin şəhəri tuta bilmir. Ətrafda və şəhərin özündə şiddətli döyüşlər davam edir”.

Malyar bildirib ki, ruslar şəhəri mühasirəyə almaq və təchizat yollarını bağlamaq üçün Avdiyevka ərazisində də hücum əməliyyatları aparır.

Bundan əlavə, Beloqorovka və Marinkada döyüşlər davam edir.

Mürtəza
Ölkə.Az