MAQATE-nin rəhbəri İranda işləmək üçün 9 milyon tələb etdi

Büdcədənkənar fondunun pulları yalnız İranın nüvə tədqiqatlarının monitorinqinə və nüvə obyektlərinin təftişinə kifayət edib

Ölkə.Az-ın xəbərinə görə, MAQATE direktoru Yukiya Amano bəyan edib ki, İranla razılaşmanın reallaşdırılması üçün Atom Enerjisi üzrə Beynəlxalq Agentliyə illik 9 milyon avro tələb olunacaq.

Amanonun sözlərinə görə, təşkilatın xüsusi büdcədənkənar fondunun pulları yalnız İranın nüvə tədqiqatlarının monitorinqinə və nüvə obyektlərinin təftişinə kifayət edib, ancaq sentyabrda bu maliyyə bitəcək.

MAQATE direktorunun hesablamalarına əsasən, 6,2 milyon avro nüvə obyektlərinin təftişi, 3 milyon isə əlavə protokolun bəndlərinin reallaşdırılmasına sərf olunacaq.

Xatırladaq ki, iyul ayında Vyanada İran ilə altılıq ölkələri arasında aparılan danışıqlarda ötən gün razılaşma əldə olunub. Bu razılaşmaya görə, İran daxilində nüvə obyektlərinin təftişi - BMT inspektorlarına hərbi obyektləri təftiş etməyə icazə verilə bilər, amma bu avtomatik olmaya bilər.

İran razılaşır ki, əgər razılaşmanı pozarsa, sanksiyalar 65 gün ərzində bərpa oluna bilər. Bundan başqa, BMT-nin silah embarqosu və raket sanksiyaları 5-8 il ərzində qüvvəsində qalacaq.

İran ilə altılıq ölkələri arasında əldə olunan bu razılaşma dünyada birmənalı qarşılanmayıb. Bir çox ölkə İranla "altılıq" arasında əldə olunan razılığı dəstəkləsə də, digərləri tənqid edir.

Rəşid Mustafazadə

Ölkə.Az