Türkiyə anti-İŞİD koalisiyasına qoşulur

ABŞ və Türkiyə Suriyanın şimalını İŞİD-dən azad edəcəklərini bildirmişdilər

Ölkə.Az xəbər verir ki, Türkiyə rəsmi şəkildə tezliklə İŞİD terror təşkilatına qarşı yaradılmış və ABŞ-ın başçılıq etdiyi beynəlxalq koalisiyaya üzv olacaq.

Türkiyənin İŞİD-ə qarşı beynəlxalq koalisiyaya qatılmasının vacibliyini Pentaqonun rəhbəri Eşton Karter deyib.

ABŞ Müdafiə nazirliyinin yaydığı məlumata əsasən, Türkiyənin terrorçulara aviazərbələr endirən ölkələr siyahısına inteqrasiya edilməsinin texniki məsələləri artıq razılaşdırılıb. Bildirilir ki, Türkiyə əməliyyatlara tezliklə başlamaq istəyir, ancaq hazırlıq işləri bir neçə gün davam edəcək.

Türkiyə hərbi-hava qüvvələri İŞİD mövqelərini ilk dəfə iyulun sonunda bombardman edib, lakin ölkə hakimiyyəti bu addımı ölkənin ABŞ-ın başçılıq etdiyi koalisiya tərkibində deyil müstəqil şəkildə atdığını iddia edirdi.

Türkiyə hökuməti bir müddət əvvəl Amerika qırıcılarının İŞİD-ə qarşı mübarizədə İncirlik hərbi bazasından istifadəsinə icazə vermişdi.

Xatırladaq ki, bundan əvvəl ABŞ və Türkiyə Suriyanın şimalını İŞİD-dən azad edəcəklərini bildirmişdilər.

Rəşid Mustafazadə

Ölkə.Az